हे महान नेत्यांनो

हे महान नेत्यांनो,

४८ तासांनी तुमची पुढील पाच वर्षांची राजकीय कारकीर्द कशी असू शकेल हे स्पष्ट होईल.

आमच्याकडून आम्ही मतदान केलेले आहे. जनता तिचा कौल देऊन मोकळी झालेली आहे. आता मतमोजणीनंतर निकालांचा कल जाहीर होऊ लागेल.

मात्र नवीन समीकरणे जुळवताना खालील गोष्टी विचारात घ्या अशी नम्र विनंती:

१. जनतेचा खरा कल लक्षात घ्या, केवळ एक अधिक एक बरोबर दोन असे उत्तर येते म्हणून सत्तास्थापनेचा दावा करू नका.

२. प्रचारात ज्यांच्याबद्दल विषारी फुत्कार सोडलेत त्यांच्याशी नाते जुळवायला जाऊ नका. कार्यकर्ते निराश होतील आणि जनता संतापेल. तुम्हाला दिलेले मत हे जनतेने तुम्हाला दिलेले आहे, तुम्ही इतर कोणाशी मतमोजणी पश्चात युती करावीत म्हणून दिलेले नाही.

३. मतमोजणी ही मनमोजणी आहे हे लक्षात ठेवा. किती मने आपल्या बाजूने आहेत ह्याचे भान ठेवा. सरकार स्थापन करू शकलात तर आश्वासनांवर कामे सुरू करा. विरोधी पक्ष बनलात तर भरीव व सकारात्मक विरोधाचे कार्य करा.

४. एवढे करून जर अतर्क्य समीकरणे जुळवलीतच तर सत्तेत याल पण जनतेला नाराज करून सत्तेत आलेला असाल हे लक्षात ठेवा. अशी सत्ता तुम्हाला पचणार नाही हा शाप जनता देत असेल हे ध्यानात ठेवा.

धन्यवाद!

हे महान नेत्यांनो,

२६ सप्टेंबर २०१४ रोजी आम्ही वर्तवलेल्या भाकितांपैकी ही दोन भाकिते खरी ठरत आहेतः

>>>निकाल विभागून लागतील, पण एकुणात भाजप व सेनेकडे मतदानाचा कल असल्याचे स्पष्ट होईल. अर्थात तसे दावे प्रत्येकच बाजूने होतील. स्टॅटिस्टिक्सचा आधार फक्त बोलबच्चनांना मिळतो ही उक्ती प्रथमच खोटी ठरू शकेल. प्रदीर्घ चर्चाफेर्‍यांनंतर बहुतेक समीकरण असे असेल. <<<

>>>शिवसेनेला प्रथमच बाळासाहेबांची अनुपस्थिती म्हणजे काय असते ते जाणवेल.<<<

>>>ह्यावेळी शरद पवारांचे राजकारण खर्‍या अर्थाने सुरू होईल. कोणाच्या खिजगणतीतही नसलेली समीकरणे प्रत्यक्षात आणण्यासाठी पवारसाहेब आपले वजन वापरतील. <<<

त्याचबरोबर, ही भाकिते चुकीची ठरत आहेतः

>>>भाजप हे सेनेशिवाय व सेना भाजपशिवाय कोणाशीही हातमिळवणी करणार नाही. तसेच दोन्ही काँग्रेस एकमेकांना सोडून अजिबात दुसरीकडे तोंड वळवणार नाहीत. अश्यात मनसे, अपक्ष व आत्ता तुटलेल्या युतीतील लहान घटकपक्ष ह्यांना सोन्याचा भाव येईल<<< (शरद पवार साहेबांनी भाजपाला बाहेरून पाठिंबा देण्याचे जाहीर केल्याने आमचे हे भाकीत खोटे ठरण्याची शक्यता निर्माण झालेली आहे)

>>>अमित शहांच्या कारकीर्दीवर मोठा काळा डाग बसेल. एकुणातच भाजपची प्रतिमा मलीन होईल<<< (भाजपाला मिळत असलेल्या जागा बहुमतासाठी पुरेश्या नसल्या तरीही आहेत त्याही जागा खूप आहेत ह्याचेच अप्रूप मानून अमित शहांच्या टोपीत पीस)

बाकी ह्या भाकितांचे काय होणार ते उद्या परवापर्यंत समजेलचः

>>>आपापले बालेकिल्ले सांभाळून जिंकलेले दादा, आबांसारखे व राणे, कदमांसारखे दिग्गज अत्यंत कडवट भूमिका घेऊन वक्तव्ये करू लागतील<<<

>>>मोदी तेव्हाही प्रधानसेवक बनल्याच्या धुंदीत वेगळेच काहीतरी करत असतील. सोनिया व राहुल आपापली स्टेटमेंट्स देऊन पटकन् मोकळे होतील<<<

माझे फेसबूकवरील स्टेटस येथेही डकवत आहे.

=======================================

शरद पवार साहेबांनी बाहेरून पठिंबा जाहीर केल्यावर प्रचंड गदारोळ सुरू झाला आहे. तो गदारोळ योग्यच आहे. पण एक समजत नाही. हा पाठिंबा भाजपने अजून स्वीकारलेला आहे का?

१. स्वीकारला तर माझ्यापुरता राजकारण हा विषय संपला. गेली वीस वर्षे मी मतदान करत आलो. त्यापूर्वीची सात वर्षे मतदानच करत नव्हतो कारण मनाला पटेल असा उमेदवार किंवा पक्षच वाटायचा नाही कोणी! भाजप व राष्ट्रवादीचे सरकार आले तर पुन्हा मतदान बंद करणार! आपले मत न देणे हाही माझा एक अधिकार आहे. आपले मत वाया न जाऊ देणे हाही माझा एक अधिकार आहे.

२. भाजपने राष्ट्रवादीचा पाठिंबा नाकारला तर माझे राजकारणातील स्वारस्य शाबूत राहील.

ह्याशिवाय, खालील मुद्दे (जे इतरत्र चर्चेत वाचले ते) पटत नाहीत.

१. हा शरद पवार साहेबांचा मास्टरस्ट्रोक वगैरे आहे! हे मला पटत नाही. अगतिकतेतून घेतलेला निर्णय आहे तो. त्यात कसला मास्टरस्ट्रोक?

२. ही शिवसेनेची कोंडी करणे आहे, हेही मला पटत नाही. त्यात कसली कोंडी? उद्यापर्यंत कदाचित उद्धवजींनीही पाठिंबा जाहीर केला तर राष्ट्रवादीचा पाठिंबा कशाला हवा भाजपला?

माझे मतः

शरद पवार साहेबांसमोर दुसरा कोणताही पर्याय उरलेला नसल्याने त्यांनी आधीच पाठिंबा जाहीर केला. हे करताना त्यांनी फक्त सोनिया काँग्रेसवर सूड उगवल्याचे समाधान प्राप्त केले इतकेच! ह्याशिवाय, राष्ट्रवादी आणि भाजपचे बाकीचे सर्व नेते आणि कार्यकर्ते, तसेच पाठीराखे ह्यांचा प्रक्षोभ झाला तर तो प्रक्षोभ राष्ट्रवादी आणि भाजप कसा सहन करू शकतील?

-'बेफिकीर'!

भाजपने राष्ट्रवादीचा पाठिंबा स्वीकारणे ह्याचा अर्थ आपल्या हजारो अनुयायांना आणि पाठिराख्यांना मुकणे!

मोदींमधील व्यावसायिक कदाचित हे होऊ देणार नाही अशी भाबडी आशा आहे.

तरीही, ते झालेच तर आपला तरी भाजपला रामराम ठरलेला!

अडवानी तर म्हणत होते की सेनेशी युती तोडायलाच नको होती व असेच आपण आधीसुद्धा म्हंटल्याचेही म्हणत होते.