मिक्स पिठाच्या दशम्या.

आज गोड दशम्यांची रेसिपी पाहिल्यावर, आमच्याकडे होणाऱ्या दश्म्यांची रेसिपी शोधली मायबोली वर..पण बहुतेक हा प्रकार इथे झाला नाहीये..
तांदळाचे आणि गव्हाचे पीठ समप्रमाणात घेऊन दूध/निम्मे दूध निम्मे पाणी/साय ह्यापैकी कशातही भिजवावे. नेहमीची कणिक भिजवतो तसेच. नंतर दोन छोट्या लाट्या कराव्यात. (ठेपल्याच्या/पराठ्याच्या असतात तेवढ्याच). एका लाटीला आतल्या बाजूने किंचित तेल लावावे. दुसऱ्या लाटीला तांदळाचे पीठ लावावे. दोन्ही लाट्या एकमेकांवर गोल फिरावाव्यात जेणेकरून तेल आणि पीठ मिक्स होईल. आणि एकमेकांवर ठेवून हलक्या हाताने लाटाव्यात. पोळी एवढ्या पातळ लाटल्या नाहीत तरी चालेल. आणि मग तूप सोडून किंवा न सोडता भाजून घ्यायच्या पोळीसारख्या! तव्यावरून काढल्यावर त्याला पापुद्रे सुटतात ते लगेच अलगद बाजूला काढावेत. तांदळाच्या पीठामुळे एकदम मऊसर होतात त्यामुळे घरातल्या आजी आजोबांना खायला एकदम मस्त!