काळजी

पोरगी वयात येत आहे, ओढणी गळ्यात घेत आहे
पाठवू कशी तिला कुठे मी ,काळजी मलाच होत आहे.......

जाहली दुकान पाठशाळा ,मंदिरात देव झोपलेला ,
बांधले हरिण दावणीला ,वाचवेल कोण पाडसाला ....

ओळखीतही दगाच होतो , पारधी हुशार होत आहे,
पोरगी वयात येत आहे ....

वाढते शरीर फ़क्त आहे ,ती अजूनही लहान आहे,
भाबड्या मनात पाप नाही , ज्ञान ही तिची तहान आहे ....

लोक चांगले कुठेच नाही , हाक कातळास देत आहे,
पोरगी वयात येत आहे .....

पाहतात देह वासनेने, स्पर्शतात काम भावनेने,
छेदती कटाक्ष कापडाला ,अंग झाकणार ती कशाने....

का दया कुणास येत नाही, ही बहिण माय लेक आहे,
पोरगी वयात येत आहे....

लांडगा मनामनात आहे ,माजली पुरुषजात आहे,
कुंपणास दात आज आले, ते स्वतःच शेत खात आहे....

दाद मागते कुणाकडे मी , चालले घराघरात आहे ,
पोरगी वयात येत आहे .....

पोरगी वयात येत आहे ,ओढणी गळ्यात घेत आहे,
पाठवू कशी तिला कुठे मी, काळजी मलाच होत आहे....

--- संतोष वाटपाडे (नाशिक)