तीर्थ क्षेत्र

Submitted by पुरंदरे शशांक on 10 November, 2013 - 22:02

तीर्थ क्षेत्र

सद्गुरु दाविती | मार्ग तो नेमका | नेतसे जो निका | मोक्षालागी ||

करिता सत्कर्मे | टाकूनि अहंता | गोडी ती चाखिता | सगुणाची ||

द्वेष मत्सरादि | जातसे जळून | येतसे भरुन | सद्भावना ||

मनाचा आरिसा | होताचि निर्मळ | प्रगटे तत्काळ | आत्मबिंब ||

प्रकाशात त्याच्या | उजळे जीवन | कृतार्थ पावन | पुण्यरुप ||

तीर्थ क्षेत्र ऐसे | सहज लाभता | धावाधाव वृथा | सांडावी गा ||

व्हावे आपणचि | पावन ऐसेच | कळो आले साच | गुरुकृपे ||

विषय: 
काव्यलेखन
लेखनसुविधा
शब्दखुणा: 
तीर्थ क्षेत्र
Groups audience: 
गुलमोहर - कविता
Group content visibility: 
Public - accessible to all site users
शेअर करा

वाचून खूप छान वाटलं...मस्त...

पण मला तंत्राची माहिती नाही..काही दुवा द्याल का अभ्यास करायला..

Submitted by जयदीप. on 10 November, 2013 - 23:16

ओवी आणि अभंग यातील मूलभूत फरक म्हणजे ओवीच्या पहिल्या तीनही ओळींमध्ये यमक असते. अभंगात दुसर्‍या आणि तिसर्‍या ओळीत यमक असते.

Submitted by शरद on 13 November, 2013 - 05:05

<<चांगल्या ओवी !>> ?

माझ्या मते हे तर अभंग आहेत! छान आहेत.

धन्यवाद शरद दोहोतील फरक दाखदिल्या बद्दल !

Submitted by मुक्तेश्वर कुळकर्णी on 13 November, 2013 - 05:19

ओवी असो की अभंग

मुळात ओवी हा काव्यप्रकार आहे तो अक्षरछंदात असतो अश्या काही ओव्या योजून एकसंध ..एकाच आशयाविषयास कॅरी करणारी कविता केली की तिला अभंग म्हणतात
मला एकच सोप्पं समीकरण समजतं
अभंग = जणू एखादी मुसल्सल गझल
त्यातली एक ओवी = जणू एक स्वतंत्र शेर

Submitted by वैवकु on 13 November, 2013 - 14:28