रशियात भीषण उल्कापात ? ही कशाची नांदी?

रशियात उल्कापात, ५०० जखमी

0
मटा ऑनलाइन वृत्त । मॉस्को

पृथ्वीपासून सर्वात जवळ अंतरावर उल्कापिंड पाहण्याचा दुर्मिळ योग खगोलप्रेमींसाठी जुळून येणार असल्याचे सांगितले जात असताना आज रशियात कडाक्याच्या थंडीत भीषण उल्कापाताने हाहाकार माजवला. अक्षरश: आगीचे गोळे इमारतींवर बरसल्याने किमान ५०० लोक जखमी झाल्याचा प्राथमिक अंदाज असून कोणीही दगावल्याचे वृत्त नाही.

मध्य रशियातील युरालजवळच्या चेलियाबिन्स्क शहरात उल्का वर्षावाने घबराट पसरली आहे. हा उल्कांचा स्फोट असल्याचा अंदाज खगोल अभ्यासकांनी व्यक्त केला आहे. आगीचे गोळे येऊन आदळल्याने कानठळ्या बसवणारा आवाज झाला. सुरूवातीला कोणलाच काही कळले नाही. मात्र थोड्याच वेळात विध्वंस समोर आला. उल्कापातात सहा इमारतींची पडझड झाली आहे. अनेक घरांच्या काचा, गाड्यांच्या काचांचाही चक्काचूर झाला आहे. अचानक कोसळलेल्या या अस्मानी संकटाने संपूर्ण शहरातच आणीबाणीसारखी परीस्थिती निर्माण झाली आहे. अनेक लोक गंभीररीत्या भाजले असून काचा फुटून हवेत उडाल्यानेही बरेच जण जखमी झाले आहेत. जखमींना तातडीने रुग्णालयांमध्ये दाखल करण्यात येत असून सध्या तेथे युद्धपातळीवर मदतकार्य सुरू करण्यात आले आहे, असे प्रशासनाने सांगितले.

'मी कार चालवत होतो. सुरूवातीला अचानक काळोख झाला आणि पाठोपाठ प्रकाशाचा भलामोठा झोत आला. या प्रकाराने मी हादरूनच गेलो. गाडी जागीच थांबवली,' असे व्हिक्टोर प्रोकोफिव या प्रत्यक्षदर्शीने सांगितले. स्थानीक वेळेनुसार सव्वा नऊच्यासुमारास ही घटना घडली. चेलियाबिन्स्क हे रशियातील एक प्रमुख औद्योगिक शहर असून तेथील झिंक प्लांट सुरक्षित असल्याचे प्लांटच्या प्रवक्त्याने सांगितले. दरम्यान, लोकांना कारणाशिवाय घराबाहेर न पडण्याचे आवाहन करण्यात आले आहे.

उल्कापिंड दिसणार का?

पृथ्वीपासून २७ हजार ७०० किलोमीटर अंतरावरून आज उल्कापिंड जाईल, असा अंदाज खगोल शास्त्रज्ञांनी व्यक्त केला आहे. पृथ्वीच्या एवढ्या जवळून जाणारे पहिलेच सर्वात मोठे उल्कापिंड असेल असाही दावा करण्यात आला आहे. विशेष म्हणजे पृथ्वीवरून सोडण्यात आलेले अनेक उपग्रहही त्यापेक्षा जादा उंचीवर आहेत. हे उल्कापिंड पृथ्वीवर आदळण्याची कोणतीही शक्यता नसल्याचे सांगण्यात आले आहे. भारतीय वेळेनुसार आज शुक्रवारी मध्यरात्रीनंतर १२. ५५ च्या सुमारास हा दुर्मिळ योग खगोलप्रेमींसाठी जूळून येणार आहे. मात्र रशियातील घटनेमुळे सर्वांच्याच पोटात गोळा उठला आहे