प्रवेशिका - १८ ( bedekarm - गूढ तव डोळ्यात केंव्हा... )

गूढ तव डोळ्यात केंव्हा, चांदणे हसलेच नाही
तू तमाला झेलले, नाही कधी म्हटलेच नाही

केवढी तलखी उन्हाची, सावली झालीस माझी
पोळ्ले तव पाय तरिही, मागुती वळलेच नाही

संधिकाली शांतवेळी, दाटले डोळ्यात पाणी
धुंद मी तव संगती अन्, कधि मला दिसलेच नाही

आठवांच्या सोबतीने, रात्र सारी जागताना
बेफिकीरित मस्त मी, मज दु:ख तव कळलेच नाही

साठले हृदयातळी जे, दाटले काठावरी, पण
दु:ख सांगाया मनातिल, ओठ तव हललेच नाही

आज मी येथे रिता अन्, दूर तूही पोचलेली
किति भराव्या ओंजळी परि ऋण तुझे फिटलेच नाही