हांडवो.. [ओट्स चा]

"हांडवो " वन -डिश-मील आहे.यात मी ओट्स चा वापर केला आहे..
मूग डाळ-उडदाची डाळ व मसूर डाळ व मेथीदाणा एकत्र करून ,धुवुन गरम पाण्यात अर्धा तास भिजवुन ठेवा.
इडली रव्यात थोडेसे पाणी घालुन ठेवा.२ मिनिटांनी रवा खाली बसला कि वरचे पाणी फेकुन पुन्हा थोडेसे दुसरे पाणी त्यात घालुन रवा भिजायला ठेवा..
आता दूधी व गाजर किसुन घ्या..
भिजवलेल्या तिनही डाळी एका रोळीत ओतुन त्यातले पाणी काढुन टाका..
सर्व डाळी,हि.मिरची,आले,लवंगा मिक्सरमधे पाणी न घालता किंचित जाडसर/रवाळ वाटुन घ्या.त्यात इडली रवा घालुन एकदा मिक्सर फिरवुन घ्या.
वाटलेल्या मिश्रणात दही,दूधी व गाजराचा किस,ओट्स ,१ टी स्पून हळद घालुन चमच्याने एकत्र कालवा..
चवीनुसार मीठ,कोथिंबीर,दाण्याची भरड,दालचिनी पूड्,मिरे पूड घाला.
तेलाची हिंग-जिरे-मोहोरी व हळद घालुन फोडणी करा . गॅस बंद करा.तयार फोडणीत कढीपत्त्याची पाने हातानेच तोडुन टाका.२ टे.स्पून तीळ घाला. आता यातील अर्धी फोडणी एका वाटीत काढून ठेवा व उरलेली अर्धी फोडणी, तयार मिश्रणावर १ टी स्पून तिखट घालुन त्या तिखटावर ओता..आता सर्व मिश्रण चमच्याने छान एकत्र कालवुन घ्या.लिंबाचा रस घालुन पुन्हा एकदा कालवा.. हे मिश्रण सरभरीत असावे.जर घट्ट वाटत असेल तर १ किंवा २ चमचे पाणी लागेल तसे टाकावे.. कारण किसलेल्या दूधी ला पाणी सुटते.त्यामुळे पाणी जरुर लागेल तितकेच टाकावे..
आता मंद गॅसवर एक तवा व त्यावर एक लहान नॉनस्टीक पॅन तापायला ठेवा.त्यावर १ टीस्पून तेल पसरुन घ्या.
मिश्रणापैकी अर्धे मिश्रण एका दुसर्‍या भांड्यात घ्या ..या मिश्रणात इनो फ्रुट सॉल्ट १ टी स्पून घालुन चमच्याने छान फेटुन घ्या.. मिश्रण पॅन मधे ओता च चमच्याने जाडसर ,गोलाकार पसरा .. वरुन १ टेबलस्पून तीळ व एक टी स्पून तेलाची फोडणी सगळीकडे पसरवा.
पॅन वर झाकण ठेवा..
साधारण ५ मिनिटे मंद गॅसवर शिजु द्या..त्यानंतर झाकण काढुन ,उलथन्याने उलटवा..[खालची बाजु सोनेरी /कुरकुरीत भाजली गेलेली दिसली पाहिजे.]आता झाकण न ठेवता दुसरी बाजु भाजा..असाच उरलेल्या मिश्रणात इनो फ्रुट सॉल्ट आणि वरुन तीळ घालुन दुसरा हांडवा भाजुन घ्या.

गरम हांडवा एका प्लेट मधे काढुन घ्या..चौकोनी वड्या कापुन चटणी / सॉस /लोणचे ,वाफाळलेली गरम कॉफी किंवा चहा बरोबर आस्वाद घ्या..