ओली आठवण

ओली आठवण

तुझी पाठवणी केली त्याला
पुष्कळ काळ उलटून गेला
भरून आलेला पापणीचा मेघ
पाउस पडून निरभ्र झाला.

दिल्या घरी सुखी आहेस
डोळा बघते, कानी ऐकतेय
अधून मधून भेटीचा योग
काळीज भरून सुखावून जातोय.

एखाद्या चुकार सायंकाळी
तरी पण का असे होते?
परतणारी पाखरे पाहून
अंधाराने मन भरून जाते.

हसून केलेल्या पाठवणीची आठवण
जाणीवेला खोलवर दुखावून जाते
पोटाशी धरून रडण्याच्या सुखाला
मुकल्याची हुरहूर लावून जाते.

मिटल्या डोळ्यांच्या खोट्या अंधारात
हरवलेला 'तो' क्षण परतून येतो,
स्मृतिकोशात तुला कवटाळताना
घळघळ मला रडवून जातो.