जणू वेदना जात्यावरती दळते आहे

Submitted by प्राजु on 3 July, 2012 - 00:12

कसे म्हणावे नशीब हे फ़ळफ़ळते आहे
उथळ सुखांच्यासवे जरा खळखळते आहे!

नव्हते ठरले कधी आपुले भेटायाचे
कशास मी त्या पाराशी घुटमळते आहे?

थुंकुन देता आयुष्याला नशिबावरती
हळू हळू ते आता थोडे कळते आहे

मन्मानीला लगाम त्यांच्या घालू जाता
नात्यांमधली गोडी का साकळते आहे??

पुरुषासाठी जन्म पणाला नारी लावे
येत तटाशी लाट सुधा आदळते आहे!

आज-उद्याला अथवा परवा येशिल तू रे
पावसा बघ वेधशाळा गोंधळते आहे!

आयुष्याची भुकटी भुकटी होउन गेली
जणू वेदना जात्यावरती दळते आहे

'प्राजू' का ना कधीच धरली खपली त्यावर?
जखम कधीची अजूनही भळभळते आहे!

-प्राजु

गुलमोहर: 
मराठी गझल
शेअर करा

आयुष्याची भुकटी भुकटी होउन गेली
जणू वेदना जात्यावरती दळते आहे>>>>>> वा

गझलही एकंदर मूड सांभाळणारी आहे

Submitted by बेफ़िकीर on 3 July, 2012 - 00:33

छानच.

Submitted by जागू-प्राजक्ता-... on 3 July, 2012 - 01:36

आयुष्याची भुकटी भुकटी होउन गेली
जणू वेदना जात्यावरती दळते आहे

'प्राजू' का ना कधीच धरली खपली त्यावर?
जखम कधीची अजूनही भळभळते आहे!

दोन्ही शेर अफाट.

Submitted by डॉ.कैलास गायकवाड on 3 July, 2012 - 03:14

गझल छान आहे..
मतला ही आवडला..
'नव्हते ठरले कधी आपुले भेटायाचे
कशास मी त्या पाराशी घुटमळते आहे?'
सुंदर...

'पुरुषासाठी जन्म पणाला नारी लावे
येत तटाशी लाट सुधा आदळते आहे!'

वरील शेरात 'येत तटाशी' असा सलग दोनदा 'त' चा उच्चार आल्याने गुणगुणताना किंचितसे अडखळायला होते आहे..

'पावसा बघ वेधशाळा गोंधळते आहे!'

या मिसऱ्यात मात्र जरी सारख्या असल्या तरी 'गागागागा गागागागा गागागागा' असे खंड पडत नसल्याने मिसरा लयीत वाचता येत नाहीये..

बाकी सगळे छान.
शुभेच्छा.

Submitted by वैभव फाटक on 3 July, 2012 - 06:07