शिळ्या पोळ्यांचे थालीपीठ : एक फर्मास पाककृती

लागणारा वेळ:
१५ मिनिटे
लागणारे जिन्नस:
शिळ्या पोळ्यांचा कुस्कर
कांदा
हिरव्या मिरच्या
बारीक चिरलेली कोथिंबीर
दाण्याचे कूट
मीठ

क्रमवार पाककृती:
१) शिळ्या पोळ्यांचा कुस्कर थोडा पाण्याचा हबकारा मारून नरम होऊ द्यावा .
२) हिरव्या मिरच्या मिक्सरवर वाटून घ्याव्यात.
३) पोळ्यांचा नरम कुस्कर + बारीक चिरलेला कांदा + मिरचीचे वाटण + मीठ + दाण्याचे कूट + बारीक चिरलेली कोथिंबीर एकत्र करून थालीपीठासाठी गोळा मळून घ्यावा.
४) तेल सोडून मस्त पातळ व खरपूस थालीपीठे भाजावीत.
५) उलटताना मोडण्याचा संभव असल्याने खूप मोठी थालीपीठे लावू नयेत.

गरम गरम थालीपीठावर तूप घालावे. लिंबाचे गोड लोणचे /चुंदा/ दही वा टोमॅटो केचप बरोबर छान लागतात.

वाढणी/प्रमाण:
मी पाच शिळ्या पोळ्या कुस्करून घेतल्या होत्या. ४ मीडीयम साईझची थालीपीठे झाली.
अधिक टिपा:
पुढच्या वेळी उकडलेला बटाटा पण अ‍ॅड करून बघणार आहे. त्याने कुस्कराला एकजिनसीपणा येईल असे वाटतेय.

फोटु नाहीत, त्याआधीच निंबुडा यांची थालीपीठे गट्टम झाली होती.

माहितीचा स्रोत:
निंबुडा यांचे "पोह्याचे थालीपीठ" ही पाककृती

http://www.maayboli.com/node/33418