तुझ्यासोबतचे क्षण..

Submitted by मी मुक्ता.. on 12 May, 2011 - 01:42

अजून मला आठवतात तुझ्यासोबतचे क्षण..
परत एकदा प्रेमात पडल्यासारखं काहीतरी झालेलं..
मनात म्हटलं हे काय भलतच,
आणि आयुष्याच्या अशा वळणावर...?
बरं.. तू असा जगमित्र,
मला अजून माझाही शोध नीटसा नाही लागलेला..
अनंत विस्तारलेली क्षितिजं समोर घेवुन तू उभा,
आणि मी परतीच्या वाटा बंद झालेल्या वळणावर..
प्रश्न तुझ्या वार्‍यालाही फिरकत नाहीत,
आणि माझ्यासमोर उत्तरांचीच कोडी..

अजून आठवतात ते क्षण.. वेडावलेले..
युगांनंतर जिवंत झाल्यासारखं वाटलेलं..
गुलमोहराच्या झाडाखाली,
अमलताशाला कवेत घेवुन येणारं वारं,
स्पर्शून जात होतं तुझ्या-माझ्यातील पोकळीला..
तुझ्या पौर्णिमेच्या सावळ्या चेहर्‍यावर
अष्टमीचा चंद्र वितळत चाललेला...
तुला खूप काही सांगायचं असताना,
न सुचलेले अर्धे-अधिक शब्द,
आपल्या त्या खळाळत्या हास्यात वळते करुन घेत होतास तू..
आणि तुला शहाणा म्हणू की वेडा ह्या संभ्रमात
मी अधिकाधिक रुतत चाललेली...

अजूनही आठवतात ते सगळे क्षण..
अशावेळी माझीच नजर लागू नये तुला चुकून,
म्हणुन लपवुन टाकते तुला
माझ्या मनाच्या घनगर्द अंधारात..
आणि मग कधी एका क्षणी,
तुझं अस्तित्व विसरुन, स्वतःतच गुंग होऊन,
खोल उतरत रहाते त्या अंधारात..
आत.. आत.. खूप खोल..
आता वर पाहिलं तर आभाळही दिसत नाही..
खालच्या खोलीचा अंदाजही येत नाही..
अशा वेळी मला मग सोडावेच लागतात,
जिवाच्या आकांताने तुझ्या प्रतिमेचे घट्ट धरुन ठेवलेले हात..
हा तळ माझ्या एकटीचा..
ही वाटही माझ्या एकटीचीच..
पण आता व्याख्येत अडकुन रहायचा कंटाळा आलाय रे..
कशाला नसते अट्टहास..
हे जे काही आहे
त्यासकट मला आठवतात अजूनही..
तुझ्यासोबत घालवलेले काही क्षण...

गुलमोहर: 
कविता
शब्दखुणा: 
मी मुक्ता
तुझ्यासोबतचे क्षण
शेअर करा

कमालीची सुंदर.......
भावार्थ अतिशय सुंदर असतो तुमच्या कवितेत.....
तुमच्या अशा कवितांचा एखादा कवितावाचनाचा कार्यक्रम झाला तर काय मजा येईल....

Submitted by निशदे on 9 June, 2011 - 12:29

सर्वांचे खूप खूप आभार..! Happy

निशदे, बापरे! अजून बराच लांबचा पल्ला गाठावा लागेल वाचन वगैरे होण्यासाठी. फक्त सुरुवातच करतेय मी आत्ता कुठेशी.. प्रोत्साहनाबद्दल धन्यवाद.. Happy

Submitted by मी मुक्ता.. on 10 June, 2011 - 00:45

मुक्ता खूप सुंदर. तुमच्या परवानगीने वहीत लिहून घेणार. एकटेपणाची सोबत. Happy Welcome to the
'Own the experience not the person' club.

Submitted by अश्विनीमामी on 10 June, 2011 - 01:30

व्वॉव!!!
जबरदस्त लिहिलंय!! Happy

निशदेंना जोरदार टाळ्या!! ह्या कविता प्रत्यक्ष ऐकायला खूप आवडतील... तुम्ही सादर करता का?
आजचा अजेंडा - तुमच्या इथल्या कविता वाचणे.. ही दुसरी की तिसरीच वाचलीये.. Happy

Submitted by हितचिंतक on 10 June, 2011 - 01:37

मुक्ताबाई
तुमची कविता खूप आवडली. उत्कृष्ट शब्दयोजनेत उत्कट भावना नेमके प्रमाणे पोचवण्याचा अप्रतिम आविष्कार.

Submitted by विक्रमसिंह on 10 June, 2011 - 04:49

अश्विनीमामी,
व्व्वा...! भारीच क्लब.. कधीपासून याची मेंबर आहे माहित नाही पण नाव आज मिळालं. खूप आभार आपले. अर्थातच वहीत लिहून घ्यायला परवानगीची गरज आहे का? Happy धन्यवाद...

हितचिंतक, अहो, सुरुवात आहे अजून.. सादर वगैरे विचारही नाही केलेला... प्रतिसदाबद्दल धन्यवाद..!

खूप खूप आभार विक्रम३११...

Submitted by मी मुक्ता.. on 10 June, 2011 - 05:48

खूप छान ,,,,,,,,,,,,,,आज......आत्तापासूनच मी आपणास आमच्या आदर्श गुरूवर्य घोषित करत आहे!!!

Submitted by अनामिका पन्वेल्कर on 11 June, 2011 - 02:59

बापरे... अनामिका... इतकं ओझं नका टाकू हो... अजून नीटशी सुरुवातही नाही झालेली माझीच....

कमलाकर.. Happy

Submitted by मी मुक्ता.. on 11 June, 2011 - 12:07

अतिशय सुंदर, मुक्ता.
शब्दांत अगदी नेमकं सांगता सांगता अर्थात विरघळत जाते शेवटी...
.......पण आता व्याख्येत अडकुन रहायचा कंटाळा आलाय रे..
कशाला नसते अट्टहास..
हे जे काही आहे
त्यासकट मला आठवतात अजूनही..
..........

Submitted by दाद on 13 June, 2011 - 02:47

दाद,
तुमच्या दाद देण्यात एक अख्खी कविता असते...
शब्दांत अगदी नेमकं सांगता सांगता अर्थात विरघळत जाते शेवटी...>> व्वा..! Happy
प्रतिसादाबद्दल धन्यवाद..!

Submitted by मी मुक्ता.. on 14 June, 2011 - 00:13

आणि मग कधी एका क्षणी,
तुझं अस्तित्व विसरुन, स्वतःतच गुंग होऊन,
खोल उतरत रहाते त्या अंधारात..
आत.. आत.. खूप खोल..
आता वर पाहिलं तर आभाळही दिसत नाही..
खालच्या खोलीचा अंदाजही येत नाही..
अशा वेळी मला मग सोडावेच लागतात,
जिवाच्या आकांताने तुझ्या प्रतिमेचे घट्ट धरुन ठेवलेले हात..

Superb Mukta!! apratim!!!
purn kavitach sundar.. pan varachya oli vishesh awadalya!!!!!

Submitted by जुई on 16 June, 2011 - 09:19

Pages