या आईला तर काही, काही कळत नाही..

Submitted by सांजसंध्या on 3 May, 2011 - 22:08

या आईला तर काही, काही कळत नाही..
------------------------------------------

या आईला तर काही, काही कळत नाही
ओरडत असते सदानकदा..जरा ब्रेक नाही..
झोपेतून उठवून नेते..खाण्यासाठी रागे भरते
इतक्या सक्काळी सक्काळी ..भूक लागत नाही
या आईला तर काही....काही कळत नाही .................................१

दूध पितां पिता कार्टून , बघू देत नाही..
बाबा बघतात बातम्या त्यांना, काही म्हणत नाही
सारखी सारखी घड्याळ बघते..बसू देत नाही
बाथरूममधे ओढत नेते..रडू देत नाही
या आईला तर काही....काही कळत नाही..................................२

कपडे, भांग, पावडर, शूज..सारं करून देते
बस येईल म्हणून मला ..बाहेर खेचत नेते
उशीर झाला किती म्हणून..भरभर येते
फूल तोडून देते तिला..कौतुकच नाही
या आईला तर काही..काही कळत नाही....................................३

शाळेमधून आल्यावरही, डबा आधी पाहते
संपवला का नाहीस शोनू...एव्हढेच म्हणते
अभ्यास काय दिलाय माझा.. हेच पाहत बसते
तिचं चित्रं काढलेलं...लक्ष देत नाही
या आईला तर काही..काही कळत नाही...................................४

होमवर्क..खाणं, क्राफ्ट ..डायरी शोधते
मला मात्र बीनची गंमत आठवत असते
लक्ष कुठंय विचारते.. धपाटाही देते
तिच्या कसं लक्षात येतं, कळतच नाही
या आईला तर काही..काही कळत नाही..................................५

दमून जाऊन झोप येते..आईला बिलगते
तेव्हां म्हणते शोन्याला या, जरा वेळ नाही
पापा घेत राहते तेव्हां ..अश्रू पुसून घेते
आई अशी रडलेली मला चालत नाही
या आईला तर काही..काही कळत नाही.................................६

संध्या
३१ ऒगस्ट २०१०
११:१९ PM

( या आधी ऑर्कूटवर पोस्ट केलेली )

गुलमोहर: 
कविता
शब्दखुणा: 
या आईला तर काही
काही कळत नाही..
शेअर करा

संध्या, ही कविता पण आवडली.
-------
शाळेमधून आल्यावरही, डबा आधी पाहते
संपवला का नाहीस शोनू...एव्हढेच म्हणते
अभ्यास काय दिलाय माझा.. हेच पाहत बसते
तिचं चित्रं काढलेलं...लक्ष देत नाही
या आईला तर काही..काही कळत नाही
-------
- हे माझ्याबाबतीत झालेलं आहे. पु.ले.शु.

Submitted by manasi_l on 3 May, 2011 - 23:08

मस्त!
लहान मुलांचे विचार आपल्याला समजत नाहीत असं आपण म्हणतो,
आणि लहान मुलंपण 'या मोठ्यांना काही कळतच नाही' असं म्हणतात Happy

आवडली कविता !

Submitted by चैतन्य दीक्षित on 4 May, 2011 - 04:20

छानच Happy

Submitted by विशाल कुलकर्णी on 5 May, 2011 - 00:36

आणि लहान मुलंपण 'या मोठ्यांना काही कळतच नाही' असं म्हणतात ...@ चैतन्य, अगदी !!
@ मोनाली , Happy एकदम मस्त ! अस होतं बर का ! दुसरा सांगेपर्यंत आपण असं करतो हे जाणवत नाही. माझ्या बाबतीत खूपदा होतं हे..

मन मानसी, गब्बर, सानी, भरतजी, सनि, वत्सला, अजो, बागुलबुवा, विशाल, भाऊ... तुम्हा सगळ्यांच्या प्रतिकिया वाचून खूपच छान वाटलं... थँक यू फ्रेंडस Happy

Submitted by सांजसंध्या on 5 May, 2011 - 03:59

आई इतकं करते म्हणूनच पिल्ल तिलाच चिकटतात. पूर्वी बाबांना टरकून असायचो आम्ही. आता पिल्ल अजिबात भाव देत नाहीत Biggrin

मस्त

Submitted by Kiran.. on 5 May, 2011 - 13:17

सुंदर...अगदी लहान मुलीच्या शब्दांत वाचली. क्यूट.
एक शेर आठवला..
रहने दो बच्चोको वैसेही
बच्चो जैसे
चार किताबे पढके
वोभी हमारे जैसे बन जायेंगे

Submitted by उमेश कोठीकर on 5 May, 2011 - 13:53

उमेश Happy

Submitted by सांजसंध्या on 6 May, 2011 - 04:04

सुंदर कविता.. माझ्या बाबतीत जरा उलटं चित्र असतं.. माझी श्रावणी म्हणते 'आई, तुला कसं काय सगळं कळतं गं?' त्यावर माझं नेहमीचं उत्तर असतं 'मी तुझी आई आहे ना म्हणुन! आणि तुलाही सगळं कळतं ना. तसंच!'......

Submitted by पल्ली on 6 May, 2011 - 07:56

हल्लीच्या पिल्लांना बुद्धी आपल्यापेक्षा जास्तच आहे !!

या आईला (आणि बाबांनाही) तर काही कळत नाही
शंभर टक्के सहमत

Submitted by असो on 15 September, 2011 - 06:59

Pages