लता मंगेशकरांवरील लेखन साहित्य

माई मंगेशकरांच्या आठवणी नाही चालणार का? नक्की नाव आणि प्रकाशन घरी गेल्यावर लिहितो.

फार पूर्वी १९६७-६८ दरम्यान 'रसरंग ' मध्ये 'लता मंगेशकर यांची संगीतमय दुनिया ' अशी एक लेख माला प्रसिद्ध होत होती त्यात प्रत्येक लेखात वेगवेगळ्या संगीतकारांच्या गाण्याचा आढावा असे. तसे विश्लेषण फार डीप नसे पण लताजींच्या करीअरचा पद्धतशीर लेखाजोखा ठेवण्याचा तो एक पहिलाच प्रयत्न असावा.... लेखक बहुधा कुणी दिलीप कुलकर्णी असावेत. दिलीप होते आडनावाबद्दल खात्री नाही.

'स्वरांचे देणे' असं मंगेशकर कुटुंबियांवर नवीन पुस्तक प्रसिद्ध झालं आहे. लेखक आठवत नाही.
माई मंगेशकरांचं शिरीष पै यांनी शब्दबद्ध केलेलं आत्मचरित्र - स्वरांच्या सावलीत
श्रीमती रेखा चौरे यांनी लिहिलेलं पुस्तक. पुस्तकाचं नाव आठवत नाही. मुखपृष्ठावर लताचं मोहन वाघांनी काढलेला डोक्यावर पदर घेतलेला फोटो आहे.
इसाक मुजावर यांनी लतावर पुस्तक लिहिलं आहे. नाव आठवत नाही. नवचेतना प्रकाशनाचं हे पुस्तक आहे.

लता मंगेशकर यांच्या गायन कारकीर्दीला २५ वर्षे झाली त्यानिमित्त वेविध मान्यवरांनी खास लिहिलेल्या लेखांचे 'लता' हे पुस्तक प्रकाशित झाले होते. त्याच्या संपादक सरोजिनी वैद्य, शान्ता शेळके आणि वृंदा लिमये या होत्या.(मी ते पुस्तक वाचल्याला पण २५ वर्षे होतील आता!). यात आशा भोसले यांनी लिहिलेल्या लेखाचे शीर्षक आहे - 'आमचे छोटे बाबा'. यातला कुमार गंधर्वांनी लिहिलेला लेख ११/१२व्याच्या मराठीच्या पाठ्यपुस्तकात अभ्यासाला होता.
(अवांतर : यातला आशाचा तो लेख राम पटवर्धनांनी सत्यकथेत आवर्जून पुनर्मुद्रित केला आणि आशाबाईंनी सत्यकथेकडून आलेला छोटासा चेक 'लेखनाचा मोबदला' म्हणून मोठ्या अभिमानाने जपून ठेवला : वडिलधारी माणसे - शान्ताबाई )

भरत मयेकरांनी उल्लेखलेल्या या पुस्तकात भीमसेन जोशी, कुमार गंधर्व, पु. ल. देशपांडे अशा अनेकांचे लेख आहेत. श्री. प्रकाश भोंडे यांनी हे पुस्तक प्रकाशित केलं होतं. पुण्याच्या एनएफएआयच्या ग्रंथालयात हे पुस्तक आहे.

मला वाटतं तेंडुलकरांच्या 'हे सर्व कोठुन येते' मध्ये ' एक मुलगी गाते' नावाचं एक स्फुट आहे लताबाईंवर.
राजहंस प्रकाशन.

तसेच मागच्या मौजेच्या दिवाळी अंकात अशोक रानड्यांचा एक बंडल लेख होता. त्यात कदाचीत अजून पुस्तकांचे संदर्भ मिळतील.

राजू भारतन यांचे पुस्तकात रुना लैला लताबाईंना कॉम्पिटिशन वगैरे असे कायकाय आहे... कुठल्या अँगलने रुना लैला लताबाईंना सि री य स काँम्पीटीशन हे कळलेच नाही. असो.

लताबाईंवर असंख्य लेख लिहिले गेले आहेत. वपुंनी एक लेख लिहिला आहे. शांताबाईंनी लिहिलेला लेख मायबोलीवर आहे. शिरीष कणेकरांनी लताबद्दल बरंच लिहून ठेवलं आहे. मन्ना डेंनी त्यांच्या आत्मचरित्रात लता-आशाबद्दल लिहिलं आहे.

माझ्याकडच्या एका पुस्तकात (नाव वगैरे आठवत नाही) एक मोठी कविता होती. सापडली तर इथं देतो.

हो खरंय मयेकर. (तरीपण रुना लैला? )
बाकी हरीश भिमाणींचेही अगदी रामभक्त हनुमानछाप पुस्तक आहे.

रैना हिंदी चित्रपट संगीतात वेगवेगळे कँप्स होते आणि काही पत्रकारही अशा कँप्सचा भाग असायचे. त्याचाच परिपाक म्हणून अशी वाक्य आली असतील.
अभिजीत देसाईंनी लोकप्रभामध्ये लिहिलेला एक(किंवा अनेकही) सुंदर लेख .
वडिलधारी माणसे (शान्ताबाई) यात लता, आशा, हृदयनाथ यांच्यावर लेख आहेत.

>>वडिलधारी माणसे (शान्ताबाई) यात लता, >> मयेकर, मी आत्ता हेच लिहायला आले होते.

हा तो लेख - http://www.maayboli.com/node/11090

शर्मिला,
नसरीन मुन्नी कबीरनं लतावर चॅनेल फोरसाठी सहा भागांचे लघुपट तयार केले होते. ते खूप चांगले आहेत, असं ऐकलं होतं. १९९१ साली चॅनेल फोरवर ते प्रसारित करण्यात आले होते.
रेखा चौरे यांचा दूरध्वनी क्रमांक माझ्याकडे आहे. तो शोधून एकदोन दिवसांत देतो.
रसरंग आता बंद झालं. पण इसाक मुजावरांकडून या लेखांबद्दल माहिती मिळू शकेल. त्यांचा रसरंगशी संबंध होता. एनएफएआयच्या ग्रंथालयात रसरंगचे जुने अंक मिळू शकतील.
गोनीदांच्या 'त्रिपदी'मध्ये लताबाईंवर एक लेख आहे. इतर लेखांपेक्षा हा लेख वेगळा आहे कारण यात लताबाईंच्या आध्यात्मिक जाणिवांबद्दल भाष्य आहे. काही काळ त्या 'शिवदासी' अशी सही करत असत, त्याबद्दलही गोनीदांनी लिहिलं आहे.
कुसुमाग्रजांनी लतावर कविता केली होती. ती सापडली तर बघतो.

शर्मिला,
रेखा चवरेंच्या पुस्तकाचं नाव 'हे रत्न भारताचे' असं आहे. प्रकाशक - परचुरे प्रकाशन.

'अपूर्व, अलौकिक, एकमेव' या यशोधरा भोसल्यांच्या पुस्तकात लता मंगेशकरांवर लेख आहे.

दिनकर पाटील यांचं 'पाटलाचे पोर' नावाचं आत्मचरित्र आहे. यात लताच्या असंख्य आठवणी सांगितल्या आहेत. दिनकर पाटील मा. विनायकांचे साहाय्यक होते, आणि तेव्हा त्यांचा लतासी स्नेह जुळला. लताने अनेक कठीण प्रसंगी त्यांना मदत केली, आणि या सगळ्या घटना त्यांच्या आत्मचरित्रात आहेत.