अनंत-यात्री

अनंत यात्री

कितिक मरणे आलो झेलीत
कितिक जगणे आलो तुडवित
मार्ग न येथे कधी संपला
अनंताचा मी तो यात्रिक १

विजय पराजय ते हि चाखले
दु:ख कधी, कधि सुख अनुभवले
चालणे मात्र कधी न खुंटले
अनंताचा मी तो यात्रिक २

हर मुक्कामी नवे साथीला
कधि हितगुज कधि खटका उडला
बंध न त्याचे नव्या घडीला
अनंताचा मी तो यात्रिक ३

खंत कशाची आता उरली
आशा ती ही मागे पडली
प्रवास कसला यात्रा ही तर
अनंताचा मी तो यात्रिक ४

चालण्यात मौज अशी वाटे
असोत सुमने वा कधी काटे
आकर्षण ना थांबायाचे
अनंताचा मी तो यात्रिक ५

पथ मी येथे नसे रेखिला
अनुमान तरि धरु मग कुठला
चालण्याविण मार्ग न उरला
अनंताचा मी तो यात्रिक ६

पथदर्शी जरि कुणी भेटला
त्याचा माझा मार्ग निराळा
चरैवेति मंत्र तरि दिधला
अनंताचा मी तो यात्रिक ७

उत्सव झाला या यात्रेचा
शब्दे काही वर्णायाचा
चालताचि तो अनुभवण्याचा
अनंताचा मी तो यात्रिक ८
...............अनंताचा मी तो यात्रिक........