आणि मी सिगरेट सोडली...
सिगरेट सोडून आज वीस वर्षं झाली मला! ओढायला सुरूवात झाली १९६२ साली! मी इंजिनियरिंगच्या दुसर्या वर्षात (S.E.) होतो व त्यावेळच्या प्रथेप्रमाणे या वर्षी इंजिनियरिंग कॉलेजच्या सर्व शाखांचे बहुतेक सर्व विद्यार्थी "भारतदर्शन"ला जायचे. म्हणजे कुठले-कुठले कारखाने पाहायच्या निमित्ताने भारतातली मिळतील तितकी प्रे़क्षणीय स्थळे पाहून घ्यायची. उदाहरणार्थ 'स्तूप' पाहण्यासाठी भोपाळमधला किंवा 'ताजमहाल' पाहण्यासाठी आग्र्यामधला कुठला तरी फडतूस कारखाना शोधून काढायचा व ते पाहायचे निमित्त सांगून स्तूप किंवा ताजमहाल पाहून घ्यायचा! मात्र 'आधुनिक भारताची तीर्थक्षेत्रे' या नावाने पंडित नेहरूंनी गौरवलेले भिलाई, दुर्गापूर, टाटानगर, राउरकेला वगैरे पोलाद कारखाने, भाक्रा नांगलचे धरण जागा तिथं इतर काही ’प्रेक्षणीय’ नसलं तरी अभिमानानं पहावीशी वाटायची.
भिलाई, दुर्गापूर या कारखान्यांचं नांव अजून "हिंदुस्तान स्टील" असंच होतं, तिचं ’स्टील ऑथॉरिटी ऑफ इंडिया’ असं पुनर्नामकरण झालं नव्हतं. "भिलाई स्टील प्लांट" पाहायला आम्ही गेलो आणि 'द्रुग' नावाच्या (त्यावेळच्या तरी) 'कुस्थानका'वर उतरलो. आम्ही एकूण ४० विद्यार्थी होतो. बाहेर धो-धो पाऊस पडत होता व आम्हाला आमच्या उतरायच्या जागी नेण्यासाठी नियोजित केलेली बस अजून यायची होती. मग तोवर काय करायचं? पाऊस तर होताच पण वर जाम थंडीही होती. एकाने टूम काढली की "चला, मस्त थंडी आहे. एकेक सिगारेट शिलगावूया"! मी अजून विद्यार्थी होतो व कमवतही नव्हतो त्यामुळे क्षणभर "करू की नको" असं झालं, पण क्षणभरच. "एकदा ओढण्यानं काय होतंय" या भावनेनं शेवटी मी त्या मोहाला बळी पडलोच व माझी पहिली सिगारेट शिलगावली.
त्याकाळी खूप लोकप्रिय असलेली (आणि बिनफिल्टरची असल्याने अगदी unadulterated poison असलेली व अगदी "Good to the last puff" या कीर्तीची ’पनामा’!) आम्ही निवडली! तिचा पहिला झुरका घेतला आणि तोंड वाकडं केलं. दुसर्याने ओढलेल्या सिगारेटचा वास किती छान यायचा पण स्वत: दम भरल्यावर मात्र अगदीच अपेक्षाभंग झाला. "हात्तिच्या, चवीला इतकी बेकार लागते असं माहीत असतं तर ओढलीच नसती!" असा विचार मनात आला. आता शिलगावलीच होती म्हणून "वसूल" करायला म्हणून संपवली. दुसरी सिगरेट शिलगावायचं खरं तर कारण नव्हतं कारण पहिल्या सिगरेटचा अनुभाव कांहीं चांगला नव्हता.
त्या काळात सिगरेट ओढणे म्हणजे एक 'ष्टाईल' समजली जायची. त्यावेळचे जवळ-जवळ सगळेच हिरो ऐटीत सिगरेट ओढायचे. त्यामुळे मग दुसरी, त्यानंतर तिसरी असं करत-करत हळू-हळू सिगरेट ओढायची आवड निर्माण होऊ लागली. पण खिसा खाली असल्यामुळे त्यावेळी सिगरेट क्वचित ओढायचो. क्वचित म्हणजे रविवारी हॉस्टेलची दुपारची ’फीस्ट’ झाल्यावर वगैरे. मेटॅलर्जीला असताना पहिल्यांदाच सिगरेटची ’किक’ काय असते ते अनुभवले. मग मात्र "स्वर्ग मेल्याविना दावी तयाला व्यसन म्हणतात" या गाण्यात सांगितल्याप्रमाणे सिगरेटच्या त्या ’किक’साठी ती ओढावीशी वाटू लागली.
हे माझे पनामा-प्रेम-प्रकरण नंतर दहा एक वर्षें चाललं. सध्याची कल्पना नाही, आता कदाचित तो ब्रँड नामशेषही झाला असेल. पण महिना ३००-४०० रुपये पगार असताना साठ पैशाला वीस सिगरेटचं पॅक या भावात मिळणारी फक्त ’पनामा’च परवडायची. "चार मिनार" आणखी स्वस्त असली तरी तिचा वास आवडायचा नाही म्हणून शेवटी 'पनामा'च एकदम प्यारी झाली होती! बी. ई. मेकॅनिकल व बी. ई. मेटॅलर्जी आटोपून मग ’मुकुंद’ कंपनीत ३२५रु. महिना पगारावर मी पाट्या टाकायला सुरुवात केली. खिशात ३०० का होईनात, पण पैसे खुळखुळायला लागले व मग ’पनामा’चं पाकीट बाळगायला सुरुवात झाली!
रहायचो हिंदू कॉलनीत माझ्या आत्याकडे. त्यामुळे घरी सिगरेट ओढायची टाप नव्हती. अगदी 'तौबा-तौबा'! पण घराबाहेर पडलो आणि पहिलं वळण घेतलं कीं धुराडं सुरू व्हायचं. आत्याला नक्कीच वास आला असेल, पण ती सूज्ञपणे कधी काही बोलली नाही. स्वत:च्या पैशाने सिगरेट ओढायला सुरुवात केल्यावर रोज २-३ सिगरेटपासून रोज १० सिगरेटचा टप्पा कधी गाठला ते कळलेच नाही. त्यानंतर ६५चे भारत-पाकिस्तान युद्ध सुरू झाले. आम्हाला आंही ब्रह्मचारी असल्यामुळे मुकुंदच्या व्यवस्थापनाने आम्हाला कळव्याच्या कॉलनीत राहायला जायची (प्रेमळ) आज्ञा केली व मी व इतर तीन माझ्यासारखे ब्रह्मचारी असे आम्ही एकूण चार ब्रह्मचारी कळव्याच्या "मुकुंद कॉलनी"त 'डेरेदाखल' झालो. कॉलनीत इतर कुणी चिटपाखरूही नव्हतं. फक्त ड्यूटीवरील रखवालदार व आम्ही. त्यात आम्हाला गस्त घालण्यासाठी धूमकेतूसारखे वेळी-अवेळी जायला सांगण्यात आले होते. कधी रात्री १२ वा. तर कधी ३ वाजता, कधी ४ वाजता! म्हणजे कुठलाही एक ढाचा नसलेले वेळापत्रक ठेवायला लागायचे. नेहमी कुठला तरी रखवालदार झोपलेला मिळायचाच, त्यातला एक गोप-बहादूर या रखवालदाराला खूपदा झोपलेला पकडल्यावर त्याचे 'झोप-बहादूर' असे नामकरणही आम्ही केले.
कंपनीनं प्रत्येकाला वैयक्तिक खोली व चौघात मिळून एक आचारी व एक वरकाम्या नोकर ठेवला होता. त्यामुळे कधी स्वयंपाक करण्याची वेळ आली नाही, ना कपडे धुण्याची. दिवसभर प्रोजेक्टची इरेक्शन-कमिशनिंगची ड्यूटी, आरामात मिळणारं जेवण व रात्री-अपरात्री मारलेल्या फेर्या असं जिप्सी टाइप जीवन आणि चार ब्रह्मचारी! मग काय विचारता? पनामाचं रोज एक पाकीट कधी संपायला लागलं ते कळलंच नाही! मग मात्र पुढची वीसेक वर्षं रोज वीस सिगरेटचा ’रतीब’ सुरू झाला. पगार वाढला तसा सिगरेट्चा ब्रँड बदलत गेला. पनामा जाऊन कॅप्स्टन, मग गोल्डफ्लेक, मग विल्स फिल्टर अशी प्रगती होत गेली, पण रोजचा वीस सिगरेटचा रतीब मात्र बदलला नाही.
मग लग्न झालं. सौ.ला माझ्या सिगरेट ओढण्याबद्दल मुळीच तक्रार नव्हती. त्यामुळे प्रेमळ आग्रहाखातर सुटायची तशीही सिगरेट सुटली नाही व रतीब चालूच राहिला. १९६४ साली "surgeon-general has determined that smoking is injurious to health" असं अमेरिकन सिगरेट्च्या पाकिटावर लिहिलं जाऊ लागलं व पाठोपाठ त्याच सुमाराला "सिगरेट ओढणे आरोग्याला हानिकारक आहे" असा प्रचार भारतातही सुरू झाला. तो प्रचार पटायचा पण "आज ओढू दे, उद्यापासून सोडू" असं करत आम्ही तो दिवस पुढं ढकलायचो. मी किंवा माझ्या मित्रांनी सिगरेट सोडायचा निर्णय कधीच मनावर घेतला नाही. पुढे मुलं झाली. पण तब्येत ठणठणीत होती म्हणून असेल पण सिगरेट सोडावी असं कधी मनानं घेतलंच नाही. दोनदा 'झटका आल्या'मुळं (म्हणजे हृदयविकाराचा वगैरे नव्हे पण असाच एक झटका) तीन-तीन वर्षांसाठी अशी दोनदा मी सिगरेट सोडलीही. त्या सहा वर्षांत मी सिगरेट फक्त परदेशवारीतच ओढायचो. सुरुवातीला परदेशी ओढायला सुरुवात केलेलं धूम्रपान मी परत आल्यावर इमिग्रेशनचं डेस्क ओलांडल्याबरोबर थांबत असे. कारण मी उरलेले पाकीट तिथंच फेकून देत असे व आणलेली ड्यूटी-फ्री पाकिटं मित्रांत वाटत असे. पण हळू-हळू 'एवढं पाकीट संपवून मग सोडूया' वरून 'एवढं कार्टन संपवून मग सोडूया' असे करता-करता धूम्रपान चालूच राहू लागलं.
या दरम्यान मी इंडोनेशियातील दुसर्या क्रमांकाचं शहर असलेल्या 'सुरबाया'ला नोकरीसाठी आलो. त्यानंतर एकच फरक झाला की Wills जाऊन '555' हा ब्रॅन्ड हाती आला. पुढे 'क्रेटेक' नांवाची लवंगेचा वास असलेली "बेंटुल बीरू-निळी बेंटुल" छापाची इंडोनेशियन सिगरेटही मला आवडू लागली, पण "वीस-एक्के-वीस"चा पाढा काही बदलला नाही.
पण त्यासुमारास एक नवी समस्या माझ्यापुढे उभी राहिली. ती म्हणजे आमची वाढत असलेली मुलं व त्यांच्या शालेय शिक्षणातील 'सामान्य ज्ञाना'चा अभ्यासक्रम. या सुमाराला माझा मोठा मुलगा १२ वर्षाचा व मुलगी ७ वर्षाची होती. त्यांना शाळेत सिगरेट ओढण्याचे गैरफायदे शिकवले जाऊ लागले. 'बाबा, सिगरेट ओढू नका, आजारी पडाल'ने सुरू झालेली गाडी 'आम्हाला अनाथ कराल बरं का'पर्यंत आली. मग मात्र 'आता सिगरेट सोडायचीच' असा निर्धार झाला. पण आता ती सुटता सुटे ना!
असं म्हणतात की सिगरेट सोडायची असेल तर एकच यशस्वी मार्ग आहे. तो म्हणजे ती ओढायला सुरुवातच न करणे. तो मार्ग तर आम्ही केव्हाच ओलांडला होता व त्यामुळे आम्हाला उपलब्ध नव्हता. मग काय करायचे?
असे करता-करता आम्ही ८७-८८च्या सुमारास त्रिनिदादला कंपनीच्या कामासाठी पोचलो. तिथे माझ्या मुलीने बंड केले. 'बाबा, तुमच्या अंगाला सिगरेटचा वास येतो म्हणून मी तुम्हाला पापी देणार नाही' हा निर्वाणीचा इशारा देऊन ती मोकळी झाली. मला खूप वाईट वाटले. "सुरबायाला गेलो की सोडीन" असं सांगून मी तात्पुरती वेळ मारून नेली. शेवटी १९८९च्या १४ नोव्हेंबरला इंडोनेशियाला 'राम-राम' ठोकून मी परत येत असताना वाटेत सिंगापूरला transit मध्ये असताना मला काय वाटले कुणास ठाऊक. मी सिंगापूरच्या transit lounge मध्ये जी सिगरेट सोडली ती आजतागायत! खरं त्यावेळी धमकी किंवा प्रेमळ बंड वगैरे कसलाही प्रयोग माझ्या मुलांकडून झाला नव्हता. पण माझ्याच मनानं घेतलं की बस झालं आता. सोडा सिगरेट.
एकदा सोडल्यावर पहिले ७-८ महिने खूप त्रास झाला. अशा वेळी मी काहीतरी चघळायला ठेवत असे. यासाठी आवळकाठी या प्रकारची आवळ्याची सुपारी म्ला बरीच उपयोगी पडली. आधीच धूम्रपानाच्या रूपाने तंबाखूची धास्ती घेतलेली असल्यामुळे धूम्रपान सोडण्यासाठी म्हणून मी तंबाखू खायला मात्र कधीही सुरुवात केली नाही. माझे असे काही मित्र आहेत की ज्यांनी हा मार्ग चो़खाळला व परिणामतः आता ते दोन्हींच्या व्यसनात गुंतले आहेत. १४ नोव्हेंबरला सोडलेल्या सिगरेटने त्यानंतर आलेल्या ३१ डिसेंबरच्या नूतन वर्षाच्या स्वागतपार्टीत परत मला मोहाची मिठी जवळ-जवळ मारलीच होती. पण निग्रहाने मी तो मोहाचा विळखा तिला माझ्याभोवती आवळू दिला नाही.
त्या संक्रमणकाळात आजूबाजूला कुणी सिगरेट ओढत असेल तर मात्र मला खूप जळफळायला व्हायचं, पण स्वनिश्चयाच्या बळावर मी सिगरेटपासून दूर राहिलो. शेवटी सहा-एक महिन्यानंतर मात्र माझ्या जवळपास कुणी सिगरेट ओढत असल्यास त्याचा त्रास व्हायला लागला. मग मला जरासे हुश्श झाले.
आजही मला खात्री आहे की मी एक सिगरेट एकदा जरी ओढली की मी पुन्हा 'वीस सिगरेट रोज'च्या रतीबाला पोचेन. तेव्हा ती पहिली सिगरेट कुठल्याही परिस्थितीत ओढायची नाही ही खूणगाठ मनाशी पक्की घातली आहे!
१३ नोव्हेंबर २००९ रोजी सिगरेट सोडून मला वीस वर्षें झाली व १४ नोव्हेंबर २००९ रोजी मी धूम्रपानमुक्त अशा २१व्या वर्षांत पदार्पण केले. मी जे केले (तब्येतीला कांहींही 'धाड' झालेली नसताना) याचा अभिमान तर आहेच पण काही लोक सिगरेट ओढताना पाहून वाईट वाटते व त्यांना मदत करावी असेही वाटते. तशी मदत मी त्यांना देऊही करतो, पण यासाठी जो आत्मनिश्चय लागतो तो दुसरा कुणी देऊ शकत नाहीं, तो आतूनच यावा लागतो. मी आत्मनिश्चयाने यशस्वी झालो तसं त्याच्याही बाबतीत व्हायला हवं हे मनात येतं व मी त्यांना सांगतो मी यात यशस्वी झालोय. तुम्ही जेव्हा निश्चय कराल त्यावेळी जर माझ्या अनुभवाचा उपयोग होईल असं तुम्हाला वाटलं तर मला सांगा, मी जरूर माझा अनुभव तुमच्या उपयोगी पडेल अशा शब्दात तुम्हाला सांगेन. अगदी फुक्कट!
अभिनंदन सुधीर. इतके वर्ष
अभिनंदन सुधीर. इतके वर्ष टिकवलेला निग्रह, यापुढेही ठेवा.
ब्रावो! कळतय पण वळत
ब्रावो!
कळतय पण वळत नाही!
सोडावी म्हण्तोय...!! पाहू.
या व्यसनापासून दूर
या व्यसनापासून दूर राहिल्याबद्दल तुमचे हार्दिक अभिनंदन. तुमचा निग्रह कायमच असा राहो.
ओढायला सुरूवात झाली १९६२
ओढायला सुरूवात झाली १९६२ साली! मी इंजिनियरिंगच्या दुसर्या वर्षात (S.E.) होतो
बापरे! म्हणजे तुम्ही जवळ जवळ माझ्याच वयाचे! का तुम्ही वयाच्या दहाव्या वर्षी इंजिनियर वगैरे 'Child Prodigy' होता?
छान छान. मी १९६५ साली चार वर्षाचा इंजिनियरिंगचा कोर्स संपवला नि १९६७ मधे मास्टर्स संपवले. माझा पहिला पगार आमच्याच कॉलेजात लेक्चरर म्हणून ५५० रु. होता. वर्षभराने टाटा त गेलो. लै पैका, लै धम्माल.
कॉलेजच्या शेवटच्या वर्षी कॉलेजच्या होस्टेलवर रहायला लागलो नि दिवसाला अर्धे पाकीटची सवय लागली ती १९७३ पर्यंत. मग मुलगा झाला म्हणून घरी बंद, नंतर हळू हळू (अगदी हळू हळू) १९८३ मधे कायमची सुटली!!
अभिनंदन. मी कोणत्याही
अभिनंदन. मी कोणत्याही स्वरूपात तंबाखूच्या सेवनाच्या विरुद्ध आहे. इट इज अ किलर वीड.
>>"हात्तिच्या, चवीला इतकी
>>"हात्तिच्या, चवीला इतकी बेकार लागते असं माहीत असतं तर ओढलीच नसती!" असा विचार मनात आला.
सेम
नशीबानं ती नाहीच आवड्ली. पण सुटणं अवघड हे खरंच आहे. पण ते 'प्रेमळ आग्रह' हेही खरं आहे. काही मित्रांनी लग्नं करुन सिग्रेट सोडलीये... टिको त्यांचंही असंच..
तुम्ही छान लिहीता जनरल लेखही.. (तो 'न्युक्लिअर डिसेप्शन' टाइपचा लेखही छान वाटला होता, म्हणुन म्हणतो आहे.)
>>अगदी फुक्कट!
हे पण चांगलं आहे.
झक्कीसाहेब, Welcome to "मेरे
झक्कीसाहेब,
Welcome to "मेरे उमरके नौजवान" ग्रूप!
होय. मी स्वत:ला ६८ वर्षाचा (चिर) तरुण समजतो व जोवर काम करत राहीन तोवर तारुण्य टिकेल असा विश्वास आहे म्हणून अद्यापही ’पाट्या’ टाकतोच आहे.
२०१२ मध्ये (सत्तरीला) ’बूट टांगायचा’ विचार आहे!
ऋयाम-जी, अंगावर मूठभर मांस
ऋयाम-जी,
अंगावर मूठभर मांस चढलं! खरं तर चढायला नको इतकं ’साठवलेलं’ आहे. पण तरी चढलं! धन्यवाद.
अभिनंदन.. शेवटी मनाचा निग्रहच
अभिनंदन.. शेवटी मनाचा निग्रहच महत्वाचा.. कोणी कितीही सांगो, शपथा देवो, जोपर्यंत आपलं मन होत नाही तोपर्यंत व्यसन सुटने नव्हे...
ऋयाम म्हणा हो. 'ऋयाम-जी'
ऋयाम म्हणा हो. 'ऋयाम-जी' वगैरे नको.
लिहीत रहा....
छान आणी एवढे वर्ष ठाम
छान
आणी एवढे वर्ष ठाम राहिल्याबद्दल अभिनंदन.
'न्युक्लिअर डिसेप्शन' च्या पुढच्या भागाची वाट बघत आहे
मामीसाहेबा, दिनेशदा-जी,
मामीसाहेबा, दिनेशदा-जी, मयुरेश चव्हाण-जी आणि रूनी पॉटर-जी,
प्रशंसेबद्दल धन्यवाद.
मामीसाहेबांशी सहमत. It is surely a killer weed.
मयुरेश-जी, मला तुमचा टेलीफोन नं व्य.नि.वर कळवा. मी तुमच्याशी संपर्क साधेन.
<<तुम्ही छान लिहीता जनरल
<<तुम्ही छान लिहीता जनरल लेखही.. >> अगदी अगदी.
Sudhirji,
You are a very good storyteller. लिहित रहा.
हम्म.... कुठलिही चैन,
हम्म.... कुठलिही चैन, व्यसनांचे अती सेवन वाईटच असते. जो पर्यंत तुमचे परिस्थिती वर (करावे अथवा करु नये) पुर्ण नियंत्रण आहे, त्यातुन एक आनंद मिळतो आणि चैन (स्वत:च्या) खिशाला परवडते तो पर्यंत या गोष्टी करायला काही हरकत नसावी (माझे मत). पण जेव्हा या गोष्टी नियंत्रणाच्या बाहेर जातात तेव्हा ते व्यसन ठरते, तो प्रकार अगदीच वाईट. अर्थात असे नियंत्रित चैन करणारे कमी असतात... चैन आणि व्यसन यातील अंतर कमी असते, व्यसनाच्या आधिन झालेल्यांच्या घरातील सर्वांनाच अतोनात मानसिक, आर्थिक त्रास होतो.
चारमिनार मला विशेष जवळची, मग पिला हाती, हॅनीड्यु... गोल्ड फ्लेक मिळमिळीत. मी स्वत: एकही सिगरेट ओढली नाही. पण या विविध प्राकारच्या सिगारेटी आमच्या काका लोकांना पुरवण्याचे काम आज्ञेनुसार करायचो. रिकाम्या पाकिटांचे सुटी मधे आम्ही "मोट्ठे " घर करायचो.
अभिनंदन.. शेवटी मनाचा निग्रहच
अभिनंदन.. शेवटी मनाचा निग्रहच महत्वाचा असतो त्याशीवाय हे शक्य नाही.
छान लिहीलय, उद्भोधक >>>>. पण
छान लिहीलय, उद्भोधक
>>>>. पण यासाठी जो आत्मनिश्चय लागतो तो दुसरा कुणी देऊ शकत नाहीं, तो आतूनच यावा लागतो. <,<
हे शब्दशः खरे
मुक्तान्गण सारख्या संस्थामध्ये दारू/सिगारेट व अन्य व्यसनान्वर "मानसोपचारादरम्यानची औषधे" देऊन व्यसन सोडण्यास मदत केली जाते, त्या औषधान्चा उपयोगही होतो, पण स्वतःचा निश्चय महत्वाचा हे ते देखिल सान्गतातच, शिवाय ही औषधे जास्त काळ घेऊनही चालत नाहीत.
चान्गल्या विषयाला तोन्ड फोडलेत
मी १९७८ ते १९८३ दरम्यान सिगारेट ओढत होतो. या पाच वर्षात दोनचार दिवसात एखाददुसरी ते दिवसाला तेविस/चौविस पर्यन्त प्रमाण वाढत गेले होते. जोडीला बनारस वा कलकत्ता एकसोबीसतिनसो वगैरे प्रकार होतेच. पण १९७३ पासुनच दमा वागवित असल्याने सिगारेटचे दु;ष्परिणाम जाणवायला लागले व १९८३ मधे सिगारेट सोडली.
दुर्दैवाने, ती सोडण्याकरता तंबाखु चघळण्याचे व्यसन मात्र लावुन घेतले गेल ते आजतागायत. पुढे कधीमधी ते देखिल सुटेल.
व्यसनाधीनता कुन्डलीवरुन देखिल बघता येते, व व्यसनी लोकान्च्या कुन्डलीत ती ग्रहस्थिती स्पष्टपणे दृगोच्चर होते असे म्हणतात.
(No subject)
अभिनंदन !! खरच आहे, मनाने
अभिनंदन !! खरच आहे, मनाने ठरवल तर काहिच अशक्य नसतं . निग्रह महत्वाचा. लेख मस्त लिहीलायत.
अभिनंदन काळे सर. >>पण यासाठी
अभिनंदन काळे सर.
>>पण यासाठी जो आत्मनिश्चय लागतो तो दुसरा कुणी देऊ शकत नाहीं, तो आतूनच यावा लागतो.
अगदी १००% बरोबर.
खरच आहे, मनाने ठरवल तर काहिच
खरच आहे, मनाने ठरवल तर काहिच अशक्य नसतं .
---- हो पण हे "मनाने" ठरवणेच अत्यंत अवघड काम आहे. सोडणार्याला वाटतही असेल सोडावे पण सुटत नसते कारण मन अजुन कुणाच्या तरी ताब्यात असते.
अभिनंदन, कोणतंही व्यसन सोडणं
अभिनंदन,
कोणतंही व्यसन सोडणं कठिण असतं पण तुम्ही करून दाखवलंत..
अभिनंदन!
अभिनंदन!
अभिनंदन. तुमचा आत्मनिग्रह
अभिनंदन. तुमचा आत्मनिग्रह असाच ठाम राहो.
सावली-साँ, आज बुधवार आहे. आज
सावली-साँ,
आज बुधवार आहे. आज चढवतो पुढचे प्रकरण. मधे एक शनिवार मी चढवले नाहीं कारण आयेशा वाचनात होती ना?
Upload किंवा Post ला एक चांगला मराठी शब्द सुचवेल कां कुणी? चढवणे म्हणजे 'हरबर्याच्या झाडवर'चे वाटते!
मनापासुन अभिनंदन. पण एक शंका
मनापासुन अभिनंदन.
पण एक शंका - २५ - ३० र्वष सिगरेट ओढल्या नंतर तुम्ही निग्रह करुन सोडलीत (जे खुप अवघड आहे), पण त्यात असे झाले का - की मनसोक्त ओढुन झाल्या म्हणुन सोड्णे जरा सोप्पे गेले ...
>>Upload किंवा Post ला एक
>>Upload किंवा Post ला एक चांगला मराठी शब्द सुचवेल कां कुणी
internet = आंतरजाल
त्यावरून Upload / post = जालबद्ध केले
असे वापरता येईल का?
खुप्प छान मस्तच माझ्या
खुप्प छान
मस्तच
माझ्या नवर्याला पण आहे हो सवय कशी घालवु त्याची ही सवय
मला आजिबात आवडत नाही
मदत
सुधीरजी मी तुमचे मनःपूर्वक
सुधीरजी
मी तुमचे मनःपूर्वक अभिनंदन करतो.
हा मार्ग अवलंबिल्या नंतर सोडायला किती अवघड असतो याची मला जाणिव आहे.
मोठ्या संकटातून सुटलात.
मला तुमच्या निग्रहाचा हेवा व अभिमान वाटतो.
मी सिगरेट सोडुन तब्बल २ दिवस
मी सिगरेट सोडुन तब्बल २ दिवस झाले आज !!
अभिनंदन. सिगारेट सोडणं तस
अभिनंदन.
सिगारेट सोडणं तस सोप्प आहे, मी आतापर्यंत १००० वेळा सोडली असेल.
बघु, तुमचा आदर्श घेऊ.
Pages