शशक स्पर्धा - बिपीन सांगळे - हिना - रस - करूण

हिना

रात्रीची वेळ. तो दुकानात गेला .तो एक रासवट माणूस होता.
‘उदबत्ती पाहिजे ‘.
दुकानदार म्हणाला , ‘नेहमीची ? हिनाच ना ?’
त्यावर तो नाही म्हणाला.
दुकानदार हसतहसत म्हणाला , ‘ हिना सारखी सारखी वापरून कंटाळा आलाय ना ?’
मग दुकानदाराने त्याला एक वेगळी उदबत्ती काढून दिली.
तो घरी गेला.
बऱ्याच दिवसांपासून त्याने तिला जवळ घेतलं नव्हतं.आज तिची फार इच्छा झाली होती. त्याचा तो रासवटपणा अनुभवायची. तिने झोपताना तसा इशाराही दिला.
त्यावर तो हसतहसत म्हणाला,’ नको ! ही ना सारखी सारखी वापरून कंटाळा आलाय .’
आधी तिला त्याचं बोलणं कळलं नाही. मग त्याच्या पुरुषी मानसिकतेचा दुष्टपणा जाणवून तिचे डोळे झरू लागले.