माझ्या आठवणीतील मायबोली - अरूण

आज माबोला २५ वर्ष झाली आहेत, त्यानिमित्ताने आठवणींना उजाळा देण्याचा माझा हा एक प्रयत्न.

नक्की सांगायचे झाले तर जानेवारी २००३ मध्ये मी मायबोली जॉईन केली. त्यावेळी ऑफीसात काम कमी आणि वेळ जास्त असल्यामुळे बराच वेळ मायबोलीवर पडीक असायचो. अर्थात फार काही लिखाण करता येईल असं काही नसल्यामुळे केवळ टीपी चालू असायचा.
पण हा टीपी करायला सुद्धा बरीच जणं असायची. USPJ हा मुख्य ग्रुप होता. कधी कधी इतक्या वेगात तिथे पोस्टी पडायच्या, की अ‍ॅडमिन तिथे येऊन शिक्षा करण्याची धमकी देऊन जायचे आणि एकदा तर ती धमकी खरी करून दाखवली होती. त्या शिक्षेच्या काळातच बाकीची मायबोली वाचून झाली. तेंव्हा V&C ग्रुपवर बर्‍याच चर्चा व्हायच्या, पण त्यात भाग घ्यायच्या ऐवजी माझा सहभाग फक्त वाचण्यापुरताच राहिला.
नाही म्हणायला एका ग्रुपवर मी बर्‍यापैकी लिहिलं (आणि बर्‍यापैकी शिव्या खाल्या) तो म्हणजे ‘पुण्यातले पुणेकर‘ आणि शिव्या खाल्ल्या, कारण माझी ४० पानी …..

जुन्या मेंब्रांपैकी USPJ वरचे आठवतायत ते म्हणजे असामी, वेलदोडा, केड्या, नात्या, सँडीजी, योगीबेअर, मै, सशल, स्टोरवी, हह आणि खुद्द अ‍ॅडमिन. यापैकी बर्‍याच जणांना मै च्या घरी प्रत्यक्ष भेटीचा योग पण आला. ते माझे पहिले गटग.
आणि मग २००४ मध्ये पुण्यात आल्यावर तर अजुन बरेच मित्र / मैत्रिणी मिळाल्या मला इथे मायबोलीवर. मया, रुमा, मिल्या, पूनम, अथक, गंधार, राकु, हिम्या, साज्या, राम, केप्या, संकल्प, श्रद्धा, सुशान्त, मीनू, अतूल, मंजुडी, प्राची …. ही लिस्ट खूप मोठी आहे. या काळातच मला मायबोलीच्या बर्‍याच उपक्रमांमध्ये भाग घेता आला.

पुण्यात आल्यावर सगळ्यात पहिली भेट झाली ती सई, गंधार, अंबर आणि नीधपची. ते माझे पुण्यातले पहिले गटग. त्यानंतर गटग ठरवायच्या आणि प्रत्यक्ष आयोजन करण्यासाठी बर्‍याच माबोकरांना भेटलो. सलग काही वर्षं गटग संयोजनात थोडाफार सहभाग घेता आला.
नंतर नंतर गटग ला जाता आलं नाही, तरी बर्‍यापैकी माबोकरांच्या संपर्कात आहे. पुण्यात असताना रविवारी वैशली आणि ‘बुधवार’ साजरा करण्याच्या निमित्ताने माबोकरांना भेटता आले.

सध्या मायबोलीवर फक्त वाचनमात्रेच असतो, राजकीय चर्चा वगळता मुख्यता प्रवासवर्णन आणि काही निवडक लेखकांचे लिखाण आवर्जून वाचले जाते. पण मुख्य म्हणजे, मायबोलीवर ओळख झालेल्या या जुन्या मित्रांच्या काँटॅक्ट मध्ये आहे, पण मायबोलीबाहेर. असं खर म्हणजे व्हायला नको, पण आहे खरं असं.
तर अशा तर्‍हेने मायबोलीमुळे मला अनेक मित्र / मैत्रिणी मिळाले. त्यातील काही अजून माबोवर आहेत, काही जणं नाहीत, पण तरीसुद्धा, जेंव्हा जेंव्हा आम्ही भेटतो किंवा सोमीवर भेटतो तेंव्हा तेंव्हा माबोचीच चर्चा जास्त होते.

असो. फार काही जास्त लिहिता येत नाही मला, त्यामुळे इथेच थांबतो.