"वायसी" व्हायरसची माहिती आणि लक्षणे

सर्वात जास्त संसर्गजन्य, अत्यंत वेगाने पसरणारा आणि सर्वाधिक लागण होणारा व्हायरस म्हणजे वायसी व्हायरस होय.

(वायसी ही अद्याक्षरे नक्की काय दर्शवितात याची आम्हास माहिती नाही, तरी ती येडछाप शब्दावरून घेतली आहेत असे ऐकण्यात आले आहे, खखोदेजा.)

स्वाइन फ्लू असो की इबोला असो की करोना, त्यासोबतच हा वायसी व्हायरस त्याच्या लक्षपटीने पसरून लागण करतो.
या व्हायरसचा मृत्युदर नगण्य असला तरी उपद्रवमूल्य दखल घेण्याइतपत गंभीर आहे. या व्हायरसवर अद्याप कुठला इलाज नाही. याची तीव्रता येत्या दशकात वाढत जाणार असल्याचे खात्रीलायक सूत्रांकडुन समजते.

याची लक्षणे:

१. मास्कची खरंच गरज आहे का, नक्की कुठला मास्क घ्यावा, तो कसा वापरावा याची शून्य माहिती असतानाही फार्मसीत धाव घेऊन मास्क खरेदी करून त्याचा तुटवडा निर्माण करणे, फेसबुकवर मास्क घातलेला फोटो अपलोड करणे.
२. अशा फोटोंना लाईक करणे.
३. नवीन पसरणाऱ्या व्हायरस बद्दल वाट्टेल ती अफवा शहनिशा न करता, तसेच वाट्टेल तसे विनोद भक्तिभावाने पुढे ढकलणे.
४. आपली वैद्यकीय पात्रता, अनुभव नसताना मित्र नातेवाईकांत त्या नव्या व्हायरसचा तज्ञ असल्याचा आव आणणे.
५. आपल्या चुकीच्या जीवनशैलीचे कौतुक करत तीच आपल्याला या व्हायरस पासून वाचवणार असल्याचा जगाला साक्षात्कार घडवणे.
६. आपले पूर्वज किती महान होते, असे व्हायरस पसरू नये म्हणुन त्यांनी काय काय पद्धती अवलंबल्या होत्या, त्याचा आपल्याला आता कसा फायदा होणार आहे, याचा जगाला साक्षात्कार घडवणे.
७. अजून हा व्हायरस नक्की काय आहे याची त्यावर अहोरात्र संशोधन करणाऱ्या शास्त्रज्ञांना पूर्ण माहिती मिळुन त्यांनी त्यावर समाधानकारक उपचाराचा विचार करण्यापूर्वीच त्यावरील होमिओपथी आणि आयुर्वेदिक रामबाण उपायांच्या पोस्ट्स जास्तीत जास्त लोकांना पाठवून त्यांना पुढे जास्तीत जास्त लोकांना पाठवण्याचे आव्हान करणे.

आणखी लक्षणे आपल्या पाहण्यात / ऐकण्यात आली असतील तर कृपया भर घालावी.