भेटणे याहून काही वेगळे असते कुठे ?

एक त्यावाचून माझे लक्षही नसते कुठे
भेटणे याहून काही वेगळे असते कुठे ?

भिंगरी हृदयास कायम बांधली आहे तुझ्या
शांत एखाद्या ठिकाणी मन तुझे बसते कुठे ?

अनुभवांनी वाढला बुध्यांक आहे एवढा
आज पूर्वीसारखे निर्व्याज मी हसते कुठे ?

तो फसवतो ते जिव्हारी लागते पण हासते
सर्व जर कळते मला तर सांग मी फसते कुठे ?

पचवले आहेत झटके जर प्रसंगांचे तिने
हादऱ्यांनी ह्या मनाची भिंत ही धसते कुठे ?

जीवनाचा सातबारा फक्त नावावर हवा !
मालकीची जमिन कोणाची, 'प्रिया' कसते कुठे ?

सुप्रिया मिलिंद जाधव