आहे तुझेच गारुड अवघ्या चराचरावर !

Submitted by सुप्रिया जाधव. on 24 February, 2015 - 21:56

फिरवून शब्द घेते करते तुझाच वापर
जावू नकोस वेडे नुसत्याच बोलण्यावर !

इथल्या कशा-कशातच मन गुंतवू नको हे
जिथल्या तिथेच सारे सोडून जायचे तर !

घनगर्द आठवांचे नभ कोसळून गेले
डोळ्यातल्या सरींनी त्यातून घातली भर !

का छेडल्या मुकुंदा हृदयामधील तारा
जुळवून सूर नव्हते बिलकूल घ्यायचे जर !

निःसंग व्हायचे का थोड़े प्रयत्न केले ?
आहे तुझेच गारुड अवघ्या चराचरावर !

निक्षून सांग त्यांना येवू नकात दारी
वेल्हाळ आठवांनो मी सोडले जुने घर !

सुप्रिया

विषय: 
काव्यलेखन
Groups audience: 
गुलमोहर - गझल
Group content visibility: 
Public - accessible to all site users
शेअर करा

इथल्या कशा-कशातच मन गुंतवू नको हे
जिथल्या तिथेच सारे सोडून जायचे तर ! >> क्या बात है ...

अतिशय सुरेख गजल ... Happy

Submitted by पुरंदरे शशांक on 24 February, 2015 - 23:02

आभार सगळ्यांचे !!

काका चाल एकदम आवडली... सगळ्याच द्विपदी घेतल्यात की ... !!

धन्यवाद !!

सुप्रिया.

Submitted by सुप्रिया जाधव. on 26 February, 2015 - 01:45

फिरवून शब्द घेते करते तुझाच वापर
जावू नकोस वेडे नुसत्याच बोलण्यावर !

निःसंग व्हायचे का थोड़े प्रयत्न केले ?
आहे तुझेच गारुड अवघ्या चराचरावर !

मस्त..मस्त.

Submitted by सुशांत खुरसाले on 26 February, 2015 - 02:46