तुलासमजून घेणारी पुरेशी माणसे नव्हती

तुला समजून घेणारी पुरेशी माणसे नव्हती
तुझ्या नाजूक प्रश्नांच्या नशीबी उत्तरे नव्हती

दिलेली हाक मी.. ऎकू तुला आली नसावी........ का?
तुझ्या-माझ्यामधे इतकी कधीही अंतरे नव्हती

तुझ्या ओल्या रुमालाच्या कडेवर राहिले काजळ
कधी डोळ्यांमधे दिसली कुणाला आसवे नव्हती

अवेळी यायचा होता बहर! शुष्कावल्या झाडा ...
तुझ्या निष्पर्णतेलाही ऋतूंची कारणे नव्हती

तुझ्या हद्दीत आल्याचे तुला वाईट वाटेस्तो
तुझ्या माझ्या घरामध्ये कधीही कुंपणे नव्हती

जयदीप