सहसा जो रुंदावत नाही

Submitted by निशिकांत on 29 September, 2014 - 01:15

सहसा जो रुंदावत नाही

घेत भरारी उंच उडावे, असे कुणाला वाटत नाही?
ज्याचा त्याचा परीघ असतो,सहसा जो रुंदावत नाही

पाय भुईवर ठेवत वास्तव जगणार्‍या जागृत लोकांना
भव्यदिव्य स्वप्ने बघण्याचे भाग्य कधीही लाभत नाही

प्रसंग बघुनी कधी नरम तर कधी गरम वागणे असावे
"सदा वाकणे हीच लीनता" तत्व मनाला भावत नाही

पाय घसरण्याच्या भीतीने ग्रस्त जाहलेल्या सभ्यांनो
ध्यान असू द्या रस्त्यावरती ना येताही भागत नाही

करार केला आयुष्याशी हास्य लेवुनी जगावयाचा
दु:ख गाडले खोल अंतरी, डोळ्यातुन ते झिरपत नाही

नवीन व्याख्या समाजातल्या समानतेची अशी असावी
"जोखड मानेवरती ठेवुन कुणी कुणाला जुंपत नाही

मंगळ आला आवाक्यात नि गर्व वाटला. पण त्या दिवशी
राजकारणी युतीयुतीचा खेळखेळण्या लाजत नाही

प्रजातंत्र हे आमजनांच्या कल्याणाचे साधन आहे
राजकारणी नेत्यांसाठी लाच खायची पंगत नाही

एक आठवण पुरून उरली "निशिकांता"ला जगण्यासाठी
मनात वावर, तिचाच दरवळ वसंत सरता संपत नाही

निशिकांत देशपांडे. मो. क्र. ९८९०७ ९९०२३
E Mail--- nishides1944@yahoo.com

Group content visibility: 
Public - accessible to all site users

पाय भुईवर ठेवत वास्तव जगणार्‍या जागृत लोकांना
भव्यदिव्य स्वप्ने बघण्याचे भाग्य कधीही लाभत नाही
> वा!

सर्वांचे मनापासून अभार प्रतिसादासाठ

इब्लिस>>>

ह्येडिंगात श्पेलिंग मिष्टीक झाली आहे.----धन्यवाद चूक दाखवल्याबद्दल. दुरुस्ती केली आहे. क्षमस्व!