प्लिज ???

Submitted by सुप्रिया जाधव. on 18 April, 2014 - 08:16

जशीच्या-तशी आजही आठवतेय रे ती दोन वर्षांपूर्वीची १५ एप्रिलची संध्याकाळ, मी नेहमीप्रमाणे स्वैंपाकघरात रात्रीच्या जेवणाची तयारी करत होते. रविवारची सुट्टी घरी घालवून, नि तू त्याच्यासाठीच खास साता-याहून आणलेल्या कंधी पेढ्यावर ताव मारुन हॉस्टेलला परत निघालेल्या अक्षयला कधी नव्हे ते तुझ्या शेजारी बसवून तू त्याच्या नकळत त्याच बौध्दीक घेत होतास. ( स्वतःचे विचार समोरच्याच्या गळी कसे उतरवायचे हे बाकी कुणी शिकावं तर तुझ्याकडूनच ! )

माझं शरीर स्वैपाकघरात नि सगळ लक्ष बाप-लेकांच्या चर्चेत रेंगाळल होत, तसा चिंटू मुळातच समजुतदार रे आपला ! तू त्याला तुझ्या अनुभवावरुन सोदाहरण पटवून देत होतास की अ‍ॅकॅडेमिक्सवर आत्ताच पूर्ण लक्ष केंद्रीत करणं किती आवश्यक आहे ते. कँम्पस ईंटर्व्हूज, पोस्ट ग्रॅज्यूएशन, त्याची फोटोग्राफी, त्याच्या ईच्छा, तुझ्या अपेक्षा... तो ही कधी नव्हत मनमोकळे प्रश्न विचारुन आपल शंका निरसन करुन घेत होता. माझा शेवटचा फुलका फुलायला नि तुमच बोलण संपायला एकच गाठ पडली होती बघ !

रविवारची सिरीयल्स नसल्याने आईही बाहेर आलेली गप्पा मारण्यासाठी. तुझ नि तिच सुत फार छान जमायच गप्पा मारताना, तिला तेच तेच प्रश्न पडायचे नि तू तितक्याच शांततेने, आपुलकीने तिच्या प्रत्येक प्रश्नाच उत्तर न कंटाळता तत्परतेने द्यायचास बाबा ! व्हायच काय त्यामुळे माझी सुटका व्हायची बघ वाचन-लिखाणासाठी !!

पण त्यादिवशी माझा हा मनोदय तू सपशेल हाणून पाडलास, मी तिथून सटकायच्या आधी बी पी च मशिन आतल्या बेडरुममधून आणून द्यायच फर्मान सोडलस. झालं ताडल मी, की आज काही आपली सुटका नाही. आत जाता जाता घड्याळाकडे पाहिल तर सात वाजलेले म्हंटल आता नऊ पर्यंतची निश्चिती ! पण खर सांगू मनातून खोलवर कुठेतरी हे सगळ किंवा हेच सगळ हव असायच रे मलाही.

तू तिच्या बी पी च रीडींग घेत होतास आणि तिला पटवून देत होतास की बी पी, डायबेटीस, किडनी फंक्शन्स व्यवस्थित राहण्यासाठी चालायचा व्यायाम आणि पाणी पिण्याच प्रमाण सुयोग्य असण किती गरजेच आहे ते, तिचेही नेहमीचे प्रश्न अन तक्रारी सुरूच होत्या.

कुणाला कस नि कितपत बोलतं करावं ? ते ही चर्चेची सूत्र पूर्णतः आपल्या हातात ठेवून ते तुला अगदीच जमायच रे ! आताही मला चर्चेत सक्रीय सहभागी करुन घेण्यासाठी तू तुझ्या ठेवणीतले खास विषय हाताळायला सुरवात केलीस, तुला पक्कं माहीती होत की, तू भविष्य विषयक-पत्रिका, ग्रह, त्यांच स्थान, त्यांची परस्परांवर पडणारी वक्र-शुभ दॄष्टी, दशा, महादशा, युती यंव नि त्यंव यावर सविस्तर बोलायला लागलास की माझं पित्त खवळतं नि तुझे मुद्दे खोडून काढण्यासाठी का होईना मी हिरीरीने चर्चेत भाग घेतेच !

पण मिंटू तू फार फार उत्तेजित झाला होतास रे हे सारं काही बोलताना, लहान मुलांनी स्वतःच्या वाढदिवसाची अगदी हरखुन वाट पहावी नं तशी तू तुझ्या या वर्षीच्या वाढदिवसाची पहात होतास बघ, तुझ्यामते ४ मे ला तुला शुक्राची महादशा प्राप्त होणार होती . किती भरभरुन बोलत होतास रे , शुक्र, त्याच पत्रिकेतल स्थान, ती अंशात्मक की काय ती स्थिती, परिणाम- दुषःपरिणाम, बाल्य-युवा-वृध्द-मॄत अवस्था .........! चिडलेच मी शेवटी नि घेतल तुला फैलावर नेहमीप्रमाणे वर्तमानात जगण्याचे सल्ले देत !! लग्गेच विषयांतर केलस ( हे ही तुझ नेहमीचच म्हणा ! )

मग आईच्या जिव्हाळ्याचे विषय काढलेस, तिचं-बाबांचं भरभरुन कौतुक केलस. त्यांच्या यशस्वी सहजिवनाचा आढावा घेताना कबुलीजवाबही दिलास की 'बांबासारखा सरळमार्गी पुरुष नवरा म्हणून मिळाला तुम्हाला हे तुमच भाग्य , नाहीतर बहुतेक सगळे माझ्यासारखेच ! ' काय नि किती बोलू अस झाल होत बघ तुला.

सरतेशेवटी पुन्हा गाडं माझ्यावर घसरलेल तुझं पण यावेळेसचा तू वेगळाच होतास रे, चक्क माझं कौतुक करत होतास तू, 'प्रियामुळे हे झालं तिच्यामुळेच ते झालं, अक्षयबद्दल पूर्ण खात्रीय माझी तो कधीही रस्ता सोडून भरकटणार नाही आयुष्यात, त्याला त्याच्या आईचे संस्कार लाभलेत' वैगरे वैगरे अन मी स्तिमित ! गेल्या वीस वर्षात कधीही सवय नव्हती रे मला तुझ्या तोंडून हे अस सारं काही ऐकण्याची . मी उठले होते तडक नि पानं घेतली होती वाढायला....

जेवणानंतर आईच्या खोलीपर्यंत तिला हाताला धरुन घेवून गेलास, तिचीही झोप कुठे पळाली होती देव जाणे ! माझ मागच आवरुन झाल तरी तुमच्या गप्पा रंगलेल्याच तिच्या बेडरुममधे ! शेवटी मीच हस्तक्षेप केला नि अक्षरशः तुझ्या दंडाला धरून आपल्या बेडपर्यंत नेलं . म्हंटलही 'उद्या उजाडणार नाहीय का ? आजच सगळ बोलून टाकतोयस ते !'

हम्न !!

ती सकाळ उजाडलीच नाही तुझ्यासाठी आणि माझ्यासाठी माझ उरलेल संपूर्ण आयुष्य अंधारात लोटून गेली बघ !

मिंटू ,

माझी जिभ काळी नाहीय रे, माहीतेय हे तुलाही .... पण मग हे अस कस झालं ? मी चेष्टेत म्हंटलेल इतकं तंतोतंत खरं कस रे ठरलं ?