तू किती लपणार आहे शेवटी?

Submitted by मानस६ on 26 November, 2013 - 21:50

तू किती लपणार आहे शेवटी?
आरसा दिसणार आहे शेवटी..!

धाडसी गमज्या जरी मी मारतो..
नोकरी करणार आहे शेवटी !

चालु द्या, तुमच्या नृपांनो वल्गना!
राम ती वरणार आहे शेवटी!

शेवटी बघशील तू देवाकडे...
अन कुठे बघणार आहे शेवटी..?!

बांध रे बिनधास्त मजले आणखी..
वैधता मिळणार आहे शेवटी!

शेवटी उरतात वेडे मोजके..
मी तिथे रमणार आहे शेवटी

थांब ना थोडी, जरा प्रतिमेमधे..
रंगही भरणार आहे शेवटी

कोळसा आहे तरी, पाहून घ्या..
मी हिरा बनणार आहे शेवटी!

मी जरी नाकारतो मृत्यो तुला
सामना घडणार आहे शेवटी

शेवटी जगशील तू माझ्याविना,
मी कसा जगणार आहे शेवटी?

मी असो, वा हा दिवा खोलीतला
एकटा जळणार आहे शेवटी!

वेड हे परिपूर्णतेचे केव्हढे..!
व्यंगही हसणार आहे शेवटी!

विषय: 
काव्यलेखन
Groups audience: 
गुलमोहर - गझल
Group content visibility: 
Public - accessible to all site users
शेअर करा

वाह काय एकसे बढकर एक शेर आहेत.
>>
शेवटी उरतात वेडे मोजके..
मी तिथे रमणार आहे शेवटी ......................... कहर!!

थांब ना थोडी, जरा प्रतिमेमधे..
रंगही भरणार आहे शेवटी .............................. वाह!

Submitted by सामो on 25 May, 2023 - 10:52

छान!

शुक्रवारचा शेर Light 1
का खातोस इतरांची कवटी
मागव कॅटीनमधून शेव टी!

Submitted by उचलली जीभ on 26 May, 2023 - 11:34

मस्त....

Submitted by मनोजकुमार देशमुख on 28 May, 2023 - 08:53

किती सुरेख!!!
>>>>>>चालु द्या, तुमच्या नृपांनो वल्गना!
राम ती वरणार आहे शेवटी!
वाह वाह!!!

>>>शेवटी उरतात वेडे मोजके..
मी तिथे रमणार आहे शेवटी
क्या बात है!

Submitted by सामो on 1 January, 2024 - 14:04

सामो Lol

Submitted by हरचंद पालव on 4 January, 2024 - 21:54

मानस६, गझ़ल खूप आवडली... Happy

Submitted by अ'निरु'द्ध on 4 January, 2024 - 22:42

@सामो, took me a minute to realize Lol
बरं आहे प्रतिसाद एडिट करता येत नाही ते, नाहीतर मला मोह आवरला नसता आणि या विनोदाला यापुढचे वाचक मुकले असते Proud

Submitted by अभिषेक_ on 9 January, 2024 - 09:28