उत्तरादाखल तुझे अश्रू कसे रे सांडले? (खयाली तरही)

Submitted by प्राजु on 3 February, 2013 - 07:21

दूरचे पर्वत बघाया जीव तोडुन धावले
अंगणी दव सांडलेले का कसे मी टाळले?

मुखवटे आहेत नुसते बेगडी चोहीकडे
ते जुने निष्पाप सारे चेहरे का लोपले?

भेटले नाहीत हक्काचे असे खांदे तया
शेवटाला चार जण शेजारचे आले भले

चाललो असतो सवे तर वाट असती देखणी
पण अता काट्याकुट्यांना मानले मी आपले

संकटाच्या पार नेण्या धावुनी आलास 'तू'
आणि बघ अस्तित्व मी होते तुझे नाकारले!!

जाणती डोळे तुझे की, मौन माझे बोलके?
उत्तरादाखल तुझे अश्रू कसे रे सांडले?

-प्राजु

Group content visibility: 
Public - accessible to all site users

तिसर्‍या व पाचव्या शेरातील आशय अगदी अचूक नसला तरीही स्वच्छ आहेच. बाकीचे सर्व शेर स्वच्छ व मतला, दुसरा आणि चौथा शेर अचूक आशयाचेही! अभिनंदन प्राजू! खयाली तरहीहीतील सहभागासाठी धन्यवाद व अभिनंदन!

शुभेच्छा!

संकटाच्या पार नेण्या धावुनी आलास 'तू'
आणि बघ अस्तित्व मी होते तुझे नाकारले!! >>>>> क्या बात है....
सर्व गजलही सुंदरच...

matla .....agadi perfect !!
shevatcha sherahi sundar ...

चाललो असतो सवे तर वाट असती देखणी
पण अता काट्याकुट्यांना मानले मी आपले
.
संकटाच्या पार नेण्या धावुनी आलास 'तू'
आणि बघ अस्तित्व मी होते तुझे नाकारले!!

लाजबाब आणि गहन शेर. Happy