गझल
जीवना! वाटे तुला का वावडे माझे?
हे तुझ्यासाठीच तुटते आतडे माझे!
मीच माझी दिलखुशीने दुर्दशा केली;
हे तुला कळणार नाही त्रांगडे माझे!
गाव हाकेच्याच होते अंतरावरती;
ऎनवेळी पाय पडले तोकडे माझे!
शेर माझे थेट शिरले काळजामध्ये....
शब्द गझलेतील होते रांगडे माझे!
चालतो नाकासमोरी नेहमी रस्ता;
का कुणी सांगा करावे वाकडे माझे?
ना स्वत:साठीच काही मागणे देवा!
हे जगासाठीच आहे साकडे माझे!!
या इथे, छत्तीस वर्षे नोकरी करतो.....
शोधतो अद्यापही मी बाकडे माझे !
भाकरी मजला मिळाली ती कृपा ह्यांची;
प्यार हे मजला घमेले फावडे माझे!
उत्तरे नाही मिळाली कैक प्रश्नांची;
आजही भिजतेच आहे घोंगडे माझे!
हास-या या चेह-यावरती नका जावू;
झाकले हृदयात सारे मी तडे माझे!
आजही लालित्य नाही जीवनामध्ये!
राहिले गिरवायचे काही धडे माझे!!
-------प्रा.सतीश देवपूरकर
भूशास्त्र व खानिज तेल तंत्रद्न्यान विभाग,
नौरोसजी वाडिया महाविद्यालय, पुणे.
फोन नंबर: ९८२२७८४९६१
छान !!
छान !!
धन्यावाद वैभवा!
धन्यावाद वैभवा!