फ्लेक्स थीम पार्क!

पुणे अचानक फ्लेक्सविरहीत झाल्याने जनतेत एकदम गोंधळ निर्माण झालेला आहे. एकतर कोण थोर नेत्यांचे वाढदिवस आहेत, कोण कोणाचे प्रेरणास्थान, स्फुर्तीस्थान आहे, कोणाची कोणत्या समितीवर निवड झाली वगैरे मौल्यवान बातम्या मिळत नाहीत. अचानक काही स्पर्धा घोषित होउन काही नेत्यांची नावे त्यासंबंधीच्या फलकात दिसू लागली आहेत पण त्यात रंगीतसंगीत फ्लेक्सची मजा नाही. त्यामुळे गॉगल घालून, दाढ्या वाढवून, फेटे बांधून, बीयर गाल वाढवून, गंध लावून स्वतःचे फोटो काढणार्‍यांचीही संख्या कमी झाली आहे. तसेच कोठेतरी जाताना कार्यकर्त्यांना हात दाखवत असलेल्या पोजमधलेही. दहावीच्या विद्यार्थ्यांना रस्त्याच्या कडेच्या खांबावरच्या छोट्या बोर्डवरच्या गुणवत्ता यादीत झळकावे की रस्त्याच्या बरोबर मधे "निवडून आल्याबद्दल अभिनंदन" मधे झळकावे हा "करियर" प्रश्न पडेनासा झाला आहे.

त्यामुळे यातून कधीही भरून न निघणारी एक पोकळी निर्माण झाली आहे त्यावर उपाय म्हणून एक शहराबाहेर फ्लेक्स थीम पार्क करावे अशी विनंती करतो. लोक नक्कीच पैसे देऊन बघायला जातील.

तेथील सोयी व इतर आयडिया जेवढ्या सुचल्या तेवढ्या मांडत आहे. जाणकार वाचकांना आणखी भारी सुचतीलच.

पार्किंगः पार्किंगचा प्रत्येक स्टॉल एका आजीमाजी नेत्याच्या, नगरसेवकाच्या नावाने. पार्किंग मधून थीम पार्क मधे नेणार्या शटल्स ना सतत पार्टी बदलणार्‍या नेत्यांची नावे द्यावीत.

थीम पार्क च्या आतमधल्या राईडस साठी तर भरपूर आयडिया आहेत. नमुन्यादाखल २-३ देत आहे. :
१. पार्टीवाईज राईड्सः त्यात त्या त्या पार्टीतील दिग्गजांचे फ्लेक्स. राईडमधे ब्याकग्राउंडला सिग्नेचर म्युझिक.
काँग्रेस: सुरूवातीला एक गायवासरू व नंतर नुसते रामसेस्टाईल पंजे. वैष्णवजन भजन ज्या सर्वात बेसुर्‍या गायकीत उपलब्ध आहे ती टेप.
भाजपः एक 'फलकविहार यात्रा' किंवा असेच काहीतरी संस्कृत (व संस्कृती)प्रचूर नाव. बाजूला पाण्यात थोडी कमळे व थोडी दलदल.
सेना: वाघाच्या डरकाळ्या. सुरूवातीला मराठीतून व नंतर हिन्दीतून समालोचन. नंतर सेनेच्या राईडमधून फुटून निघणारी मनसे ची राईड.
मनसे: फक्त खळ्ळ खट्याक ब्याकग्राउंड व राईडच्या मधे एक टोल बूथ जो प्रत्येक राईडला फुटेल व पुन्हा उभा राहील.

२. मेक युअर ओन फ्लेक्सः
चेहर्‍याची जागा मोकळी ठेवलेले -निवडून आल्याबद्दल अभिनंदन पासून ते दु:खद निधन ते पहिली पुण्यतिथी पर्यंत चेहराविरहीत फ्लेक्स. म्हणजे मागे आपण जाऊन आपला चेहरा तेथे दिसेल असे उभे राहून फोटो काढायचा. चेहर्‍यावरचा टर्रेबाज पणा दाखवणारा मेकअप, बीयर गाल (विजयराज सुद्धा मोहनलाल दिसेल एवढे), दाढी, गंध, सोनेरी फ्रेमचा गॉगल, इतर दागिने वगैरे तेथेच भाड्याने मिळेल.

३. फ्लेक्स म्युझियमः
यात महाराष्ट्रातील ठिकठिकाणी जे वैविध्यपूर्ण फ्लेक्स लावलेले असतात त्याचा संग्रह. उदा: झब्बा लेंगा घालून, सोन्याचे घड्याळ मिरवत गॉगल लावून सिंहासनावर बसलेला कोणी बंटीशेठ, ज्याचे नाव समजत नाही पण आडनाव एकदम ओळखीचे असते, मोटरसायकलवरून कोठेतरी निघालेले कोणीतरी दादा, थोर स्वातंत्र्यसैनिकांच्या फोटोंबरोबर बिनदिक्कतपणे आपला फोटो लावलेले कोणी भाऊ, दहीहंडीच्या फ्लेक्सला खाली ४०-५० फुटकळ कार्यकर्त्यांची नावे, मधे जरा वट असलेले ८-१० कार्यकारी सभासद व वरती लोणी खाणारा मुख्य नेता असा प्रतिकात्मक फ्लेक्स ई. गोष्टी ठेवता येतील.

अजून काही कल्पना विचाराधीन आहेत. आपणही सुचवा