ऐ मेरे प्यारे वतन - प्रेम धवन

Submitted by टवाळ - एकमेव on 11 May, 2012 - 01:10

साल १९६१ - निर्माता बिमल रॉय यांचा "काबूलीवाला" प्रदर्शित झाला. रविंद्रनाथ ठाकूरांची (टागोरांची) मुळ जबरदस्त कथा, तिला विश्राम बेडेकरांनी चढवलेला पटकथेचा साज, बलराज सहानी-उषा किरण आणि बेबी फरीदा (जलाल) यांचा अप्रतिम अभिनय आणि या सर्वांवर कळस म्हणून की काय सलील चौधरी यांचे संगीत. असा सगळा सोहळा जमून आल्यानंतर प्रेक्षक भारावतील नाही तर काय ? पण एवढं सगळं असूनही या चित्रपटाचा खरा आत्मा ठरलं मन्ना डे यांनी गायलेलं एक गीत -

माँ का दिल बनके कभी, सिने से लग जाता है तु
और कभी़ नन्हीसीं बेटी, बनके याद आता है तु
जितना याद आता है मुझको, उतना तडपाता है तु
तुझपें दिल कुर्बान
ऐ मेरे प्यारे वतन, ऐ मेरे बिछडे चमन
तुझपें दिल कुर्बान

आज या गीताच्या जन्माला ५० वर्षांपेक्षाही अधिक काळ लोटला आहे. तरी देखील जेव्हा जेव्हा हे गाणं ऐकतो तेव्हा तेव्हा डोळ्यातून पाणी येतंच. आम्ही आमच्या देशात राहूनही जर हे होतयं, तर वर्षानूवर्षे भारताबाहेर रहाणार्‍यांचे काय होत असेल ! मन्ना डे यांचा आर्त स्वर, त्याला फक्त एका मेंडोलीनची आणि थोड्याशा र्‍हिदमची साथ आणि या गाण्याचे बोल. सगळं एक अजब रसायन आहे. जे फक्त अश्रुधुर पसरवतं ! Happy वास्तविक या चित्रपटातली बाकीची सर्व गाणी जी गुलजा़र यांच्या सिद्धहस्त लेखणीतून उतरली आहेत, तीही तितकीच ताकदीची आणि लोकप्रिय आहेत. पण या गाण्याची बातच और आहे.

साल १९६५ - निर्माता केवल कश्यप यांचे नाव पुढे करून मनोज कुमारने चित्रपट निर्मीती मधे उतरायचे ठरवले. मनोज कुमारला या देशातल्या लोकांची मानसिकता अचुक पणे माहीती होती. त्यामुळे त्याने सरळ देशभक्तीपर चित्रपट बनवण्याचे योजले. कथा निवडली शहीद भगतसिंग यांची. रामप्रसाद बिस्मील यांच्या काही मुळ रचना त्याने चित्रपटात वापरायच्या ठरवल्या. बाकी गाण्यांचा प्रश्न होता. गीतकार पी.एल.संतोषी (राजकुमार संतोषी यांचे वडील) हे मनोजकुमारचे खास मित्र. त्यांनीच मनोज कुमारला प्रेम धवन यांचे नाव सुचवले. चित्रपट प्रदर्शित झाला. मोहम्मद रफी यांच्या आवाजातले रामप्रसाद बिस्मील यांचे "सरफरोशी की तमन्ना" लोकप्रिय झालेच. पण त्याहून लोकप्रिय झाले - "ऐ वतन, ऐ वतन, हमको तेरी कसम" आणि क्लायमॅक्सला असलेले "मेरा रंग दे बसंती चोला". या चित्रपटाचे संगीतही प्रेम धवन यांचेच होते.

साल १९६६ - फेब्रुवारी महीना - चर्चगेट स्टेशनच्या बाहेर त्याही वेळी चाकरमान्यांचे लोंढे सकाळच्या वेळात असायचेच. या गर्दीमध्ये एक भिकारी हार्मोनियम घेऊन जमेल त्या सुरात गात होता. अचानक गर्दीमधून एक रेघा-रेघांचा बुशकोट घातलेला किंचीत स्थुल बांध्याचा ईसम पुढे आला. त्याने त्या भिकार्‍याची आस्थेने चौकशी केली. थोड्या वेळाने त्याने त्या भिकार्‍या कडून हार्मोनियम मागून घेतली. आणि गायला सुरवात केली - "गरीबोंकी सुनो, वो तुम्हारी सुनेगा, तुम एक पैसा दोगे, वो दस लाख देगा". त्याच्या दैवी आवाजाची जादू लगेच झाली. भिकार्‍याच्या थाळीत त्या दिवशी पैशाचा वर्षाव झाला. त्यात आपलीही थोडी भर घालून तो ईसम जसा आला तसाच निघून ही गेला. हा किस्सा खरा असावा. कारण तो भिकारी म्हणजे स्टंटपटांच्या जमान्यातला एक लोकप्रिय हिरो होता आणि तो दयाळू गायक होता - मोहम्मद रफी. त्याच सुमारास प्रदर्शित झालेल्या दस लाख या चित्रपटातले तोपर्यंत लोकप्रिय झालेले हे गाणे गाऊन त्या जुन्या सहकार्‍याला मदत मिळवून देणे हे फक्त रफींनाच सुचू शकते. हा किस्सा खरा असु शकण्याचे आणखी एक कारण, मी तो रसरंग या सिने-पाक्षिकामधे श्री. ईसाकजी मुजावर यांच्या लेखात वाचला आहे. ईथे हा किस्सा केवळ एवढ्यासाठी नमूद करावासा वाटला कारण या गीताचे गीतकारही प्रेम धवन हेच होते. थोडे विषयांतर होईल, पण आम्ही मित्र संगीतकार रवी यांना भिकार्‍यांचे मसिहा म्हणायचो. कारण भिकार्‍यांना उपयोगी पडू शकतील अशी एक नव्हे तीन तीन गाणी त्यांच्या संगीतदिग्दर्शनात बनली. "गरीबोंकी सुनो, वो तुम्हारी सुनेगा" - दस लाख, "औलाद वालों फुलों फलों" - एक फुल दो माली आणि "तुझको रख्खे राम, तुझको अल्ला रख्खे" - आँखे. पैकी पहील्या दोन गाण्यांचे गीतकार प्रेम धवन हेच होते हे आणखी विशेष.

१९४८ साली आलेल्या बाँबे टॉकीजच्या "जिद्दी" या चित्रपटाने हिंदी चित्रपटसॄष्टीला ३ नवे कलाकार मिळवून दिले. एक म्हणजे, देव आनंद यांना नायक म्हणून लाभलेलं पहीलंच व्यावसायिक यश त्यामुळे देव आनंद यांची कारकिर्द खर्‍या अर्थाने सुरू झाली. दुसरे म्हणजे प्रेम धवन यांना गीतकार म्हणून पहीला मोठा ब्रेक आणि तिसरी आणि सर्वात महत्त्वाची गोष्ट म्हणजे देवाच्या सर्वात लाडक्या बाळांपैकी एक असलेला किशोर कुमार नावाचा गायक, नायक, संगीतकार आणि बरंच काही. किशोरने गायलेले पहिले गाणे - "मरनेंकी दुवाएं क्युं मांगू, जिने की तमन्ना कौन करे" हे प्रेम धवन यांनीच लिहीलं होतं.

देशभक्तीपर गाणी लिहीताना प्रेम धवन यांच्या प्रतिभेस विशेष बहर येई. "छोडो कलकी बातें, कल की बात पुरानी" हे हम हिंदूस्थानी या चित्रपटातील गीत त्याचे आणखी एक उदाहरण. याचे कारण त्यांच्या बालपणात दडलेले आहे. प्रेम धवन यांचे वडील ब्रिटीश सरकारच्या नोकरी मधे जेल सुपरिंटेंडेंट होते. त्यांच्या वेगवेगळ्या ठिकाणच्या बदल्यांमुळे प्रेम धवन यांनी लहानपणीच तुरूंगात असलेल्या स्वातंत्र्यसैनीकांचे ब्रिटीशांनी केलेले हाल पाहीले होते. पुढे मोठेपणी त्यांनी ला॑होरच्या कॉलेजमधे प्रवेश घेतला जिथे त्यांचे वर्गमित्र होते - साहीर लुधीयानवी. साहीरच्या बरोबरीने प्रेम धवन यांनीही वेगवेगळ्या चळवळींमध्ये भाग घेतला. अनेक देशभक्तीपर कविता त्या दोघांनी लिहील्या. ते दोघेही बरोबरीने कम्युनिस्ट पार्टीमधे सामील झाले. पुढे मुंबईला आल्यावर त्यांनी "ईप्टा" मधे प्रवेश केला. ईथे त्यांनी वेगवेगळी नाटके, गाणी आणि नृत्याच्या माध्यमातून कम्युनिस्ट चळवळीला हातभार लावला. काही काळ ते पं. रवीशंकर यांच्याकडे शास्त्रीय संगीतही शिकले. याचाच फायदा त्यांना पुढे "शहीद" आणि ईतर काही चित्रपटांना संगीत देताना झाला. पं. रवीशंकर यांचे मोठे बंधू उदय शंकर यांच्याकडे त्यांनी शास्त्रीय नृत्याचेही धडे घेतले.

पण एवढे सगळे गुण असूनही, दर्जेदार काव्य रचूनही त्यांचे समकालीन गीतकार/कवी शैलेंद्र, साहीर आणि हसरत जयपूरी यांच्याप्रमाणे स्वत:ची वेगळी ओळख बनवण्यात ते अपयशी ठरले. हा एक प्रकारे त्यांच्या प्रतिभेवर झालेला अन्यायच म्हणावा लागेल. आणि रसिकांचं दुर्दैव. संगीतकारांमधे खेमचंद प्रकाश (यांनी त्यांना पहीली संधी दिली), अनिल विश्वास, सलील चौधरी, चित्रगुप्त आणि रवी यांच्याशी त्यांचे विशेष जमायचे. त्यातही सर्वात जास्त (लोकप्रिय) गीते त्यांनी रवी यांच्या संगीतामधे दिली.

काव्याबरोबरच नृत्याचीही त्यांना विशेष आवड होती. काही चित्रपटगीतांचे नृत्यदिग्दर्शन त्यांनी केले. त्यात विशेष उल्लेख म्हणून नया दौर चित्रपटातील "उडें जब जब जुल्फे तेरी" चा उल्लेख करावा लागेल. या व्यतीरिक्त दो बिघा जमिन, धूल का फूल, गुंज उठी शहनाई, वक्त या आणि अशाच काही चित्रपटांचे सहाय्यक नृत्यदिग्दर्शक म्हणूनही त्यांनी काम केले.

त्यांची काही गाजलेली गाणी खालीलप्रमाणे -

१. ऐ मेरे प्यारे वतन - काबूलीवाला (मन्ना डे यांच्या सर्वोत्तम पाच गाण्यांपैकी) *
२. सिनें में सुलगते है अरमान - संगदिल
३. मुझे प्यार की जिंदगी देने वाले - जबक
४. तेरी दुनियासें दूर, चले होके मजबूर - जबक
५. तेरी दुनियांसें, होके मजबूर चला - पवित्र पापी
६. वफा़ जिनसें की, बेवफा़ हो गये -
७. छोडो कलकी बातें - हम हिंदूस्थानी
८. ऐ वतन, ऐ वतन, हमको तेरी कसम - शहिद
९. मेरा रंग दे बसंती चोला - शहिद (चित्रपटातले गीत प्रेम धवन यांनी लिहीले आहे. मुळ गीत वेगळे आहे)
१०. एवें दुनीया, देवे दुहाई (तेकी मै झूठ बोलीयां) - जागते रहो *
११. तुझें सुरज कहूं या चंदा - एक फुल दो माली
१२. ओ नन्हेसें फरीश्तें - एक फुल दो माली

* - ही दोन्ही गाणी त्या त्या चित्रपटातली प्रेम धवन यांची एकमेव गाणी आहेत. काबूलीवाला ची बाकी गाणी गुलजार यांची तर जागते रहो मधली शैलेंद्र यांची.

असा हा हरहुन्नरी कवी /गीतकार आणि संगीतकार. दि. ७ मे रोजी त्यांचा ११ वा स्मृतीदिन होता. दुर्दैवाने ईतर लेखांच्या गडबडीमधे नजरचूकीने या कलाकाराला योग्य वेळी मानवंदना द्यायची राहून गेली. आयुष्यभर ईतर प्रतिभावान कवींच्या सावलीमुळे थोडासा उपेक्षितच राहीलेल्या या कलाकाराची माझ्यासारख्या किंचीत चित्रपटवेड्याकडूनही चित्रपटांच्या या शतकोत्सवी वर्षात अशी उपेक्षा व्हावी याला काय म्हणावं ? Sad

सलाम प्रेम धवनजी ! त्रिवार सलाम !
*****************************************************

आधीच्या लेखांच्या लिंक्स -
http://www.maayboli.com/node/34700 - मन्ना डे
http://www.maayboli.com/node/34742 - नौशाद
http://www.maayboli.com/node/34833 - तलत मेहमूद
http://www.maayboli.com/node/34857 - कैफी़ आझ़मी

गुलमोहर: 

देशभक्तीपर गीते तर ते लिहितच पण पंजाबी लोकसंगीत पण त्यांना प्रिय होते.

लताच्या आवाजातले. हम तो लूट गये तेरे प्यार मे, जाने तूझको खबर कब होगी.. हे माझ्या खास आवडीचे.

दो बीघा जमीन मधले, जगन जगन जग जग रे.. या गाण्यावरचे उस्फुर्त लोकनृत्य पण खास बघण्यासारखे आहे.

सुदैवाने दोन्ही गाणी आहेत यू ट्यूबवर..

बाकी हा लेखच नव्हे तर हि मालिकाच खुप छान होतेय.

किती सुरेख ओळख करुन दिलीत या अतिशय गुणी माणसाची - माझ्याकडे शब्द नाहीत कौतुक करायला........

गीतकार, संगीतकार, नृत्यदिग्दर्शक - बापरे, काय म्हणावे या व्यक्तिला.....

रफीसाहेबांचा किस्साही अफलातूनच.........

सर्वात महत्त्वाची गोष्ट म्हणजे देवाच्या सर्वात लाडक्या बाळांपैकी एक असलेला किशोर कुमार नावाचा गायक, नायक, संगीतकार आणि बरंच काही. किशोरने गायलेले पहिले गाणे - "मरनेंकी दुवाएं क्युं मांगू, जिने की तमन्ना कौन करे" हे प्रेम धवन यांनीच लिहीलं होतं.>>>>>> या वाक्याला फक्त सलाम, सलाम आणि सलाम...

अवांतर - किशोरदांवर असाच लेख येऊ द्या की......

मस्तच लेख.

मालिका उत्तम होत चालली आहे ह्या दिनेशदांच्या मताशी सहमत. अजून येऊद्या...

अवांतर - किशोरदांवर असाच लेख येऊ द्या की......>>> १३ ऑक्टोबर पर्यंत वाट पहावी लागेल बहुधा Proud

दिनेशदा, शशांक, विदिपा आणि योग - प्रतिसादाबद्दल मनःपूर्वक धन्यवाद ! Happy

@ शशांक - कणखर यांनी उत्तर दिलंच आहे ! या ईंडस्ट्रीने मला भरपूर दिलं आहे ! प्रत्येकाच्याच माझ्यावरच्या कर्जाची पोचपावती देण्याचं ठरवलं आहे ! ती जरा क्रमाने देऊया ! कसं ? Happy

संपूर्ण लेख वाचला नाही कारण तिसर्‍याच ओळीवर अडलो. काबुलीवाला मधली बेबी फरिदा म्हणजे फरिदा जलाल नाही. ती त्या काळातली प्रसिद्ध बालकलाकार बेबी फरिदा. सध्या दूरदर्शन मालिकांतून दिसते. कलर्सवरच्या उतरन मालिकेत झोपडपट्टीत राहणार्‍या वृद्ध प्रेमळ स्त्रीच्या भूमिकेत दिसली होती. त्यांची मुलाखत अलीकडेच विविधभारतीवर ऐकली तेव्हाच त्यांच्या भूत़काळातल्या कर्तबगारीबद्दल कळले.

बाकीचा लेख सावकाशीने वाचतो.

गीतकार, संगीतकार, नृत्य दिग्दर्शक, सामाजिक प्रश्नांची विशेष जाण, भाषेवर हुकूमत अशा विविध गुणांनी संपन्न असूनही यशाचे जितके माप हिंदी सिनेसृष्टीने प्रेम धवन यांच्या पदरात टाकायला हवे होते, तितके त्यांच्या वाट्याला जरी आले नसले तरी जितक्या संधी मिळाल्या त्या प्रत्येक ठिकाणी त्यानी आपले नाव ठळकपणे उमटविले हे या लेखाचा मूळ हेतू असलेल्या 'काबुलीवाला' चित्रपटाने सिद्ध केले. 'शहीद' च्या संगीत आणि गीतलेखन या दोन्ही महत्वाच्या बाबी त्यानी पुरेपूर ताकदीने सांभाळल्यामुळेच आज शहीदच्या त्या दोन गाण्यांची देशभक्तीचा विषय निघाला की आठवण होतेच होते.

बाकी लेखात श्री.टए यानी इतकी विस्तृत माहिती दिली आहे की त्यात अधिकची भर घालण्यासारखे काही उरलेलेच नाही.

मात्र 'जिद्दी' चा उल्लेख करताना किशोरचे नाव जसे आले, तसेच त्याच बरोबरीने लता मंगेशकरने म्हटलेल्या प्रेम धवन यांच्या 'चंदा रे जा रे जा रे...' या "छायानट" रागावर बेतलेल्या लडिवाळ गीताची आठवण होणे स्वाभाविक मानले गेले पाहिजे. आजही खूप भावते हे गाणे आणि पडद्यावर ते म्हणणारी कामिनी कौशलही.

[एक छोटासा बदल करा शैलेन्द्र : "मुझे प्यार की जिंदगी देने वाले..." हे गाणे 'प्यार का सागर' मधील....राजेन्द्रकुमार आणि मीनाकुमारी]

लेखमाला उत्तम होत चालली आहे...दिनेशदा यांच्या मताशी अगदी सहमत.

अशोक पाटील

सुरेख परिचय.... आमच्या पीढीला गाणी माहिती आहेत पण असे पडद्या मागचे लोक माहित नाहीत

ऐ मे प्यारे वतन

खरच खास!!!

धन्स