कसे जगायचे ?

Submitted by UlhasBhide on 4 March, 2011 - 04:07

कसे जगायचे ?

असेच का कसेबसे आयुष्य हे रेटायचे ?
की सुखाचे क्षण प्रयत्ने त्यातुनी वेचायचे ?

अडथळे आले म्हणूनी का तिथे थबकायचे ?
की तयांना लंघण्याचे मार्ग चोखाळायचे ?

विपुल असते दु:ख म्हणुनी त्यात का डुंबायचे ?
मंथुनी भवसागरा सुखरत्न की मिळवायचे ?

करुण कविता प्रसवुनीया दु:ख का पोसायचे ?
नवरसांनी शिंपुनी की काव्य जोपासायचे ?

लागला कणसूर तरि का मैफिली त्यागायचे ?
घेउनी आलाप ताना की समेवर यायचे ?

भंगल्या स्वप्नासवे का भंगुनीया जायचे ?
छिन्न त्या स्वप्नावशेषां की पुन्हा जोडायचे ?

समजुनीया भार हे आयुष्य का कंठायचे ?
मानुनी वरदान की ते निशिदिनी घडवायचे ?

.... उल्हास भिडे (४-३-२०११)

गुलमोहर: 
कविता
शेअर करा

अडथळे आले म्हणूनी का तिथे थबकायचे ?
की तयांना लंघण्याचे मार्ग चोखाळायचे

द्विपदी व कविता आवडली.

कवी प्रदीप निफाडकरांच्या गझलेचा मतला आठवला.

असेच का प्रदीप मी कसेबसे जगायचे (हा मतलाच आहे, मक्ता नव्हे)

Submitted by बेफ़िकीर on 4 March, 2011 - 04:09

उल्हास,
अप्रतिम कविता! Happy
अगदी खास जमलिये.
फारच प्रेरणादायी आहे.

फक्त ते >>लंघण्याचे>> आहे ते लांघण्याचे करशील का?

Submitted by दक्षिणा on 4 March, 2011 - 04:10

खुप छान

Submitted by मुक्तेश्वर कुळकर्णी on 4 March, 2011 - 04:49

लागला कणसूर तरि का मैफिली त्यागायचे ?
घेउनी आलाप ताना की समेवर यायचे ?

वा! खूप खूप आवडली कविता.

Submitted by क्रांति on 5 March, 2011 - 08:40