Merrier & merrier...the X'Mas !!!

Posted
13 वर्ष ago
शेवटचा प्रतिसाद
13 वर्ष ago

IMG_1483.JPG

यंदा ख्रिसमससाठी आम्हाला माझ्या आत्येभावाकडून बोलावणे होते. त्याच्या बायकोने- ब्याता- पोलिश पद्धतीने ख्रिसमस साजरा करायचा फतवा काढला होता. भावाने आणि मी कमीत कमी आल्याचा चहा मिळाला पाहिजे असे घोडे दामटायचा प्रयत्न केला पण आम्हाला, "Do not mess with my x'mas !!" अशी सक्त ताकिद मिळाल्यावर ख्रिसमसला आल्याचा चहा केल्यास पुढल्या वर्षी गणपतीत मोदकांच्या ऐवजी प्येरोगि मिळतील ह्या भितीने आम्ही चहा बासनात गुंडाळला.

पोलिश कल्चरप्रमाणे ख्रिसमस इव्हला म्हणजे २४ तारखेला मुख्य सेलिब्रेशन असते. ह्या दिवशी संध्याकाळी पाच-साडेपाचला सर्व फॅमिली मेंबर एकत्र जमतात. ख्रिसमस ट्री आधीच सजवून झालेला असतो. सगळी गिफ्ट्स सुंदर आकर्षक आवरणांमध्ये ख्रिसमस ट्री खाली ठेवलेली असतात. आधी पोटोबा आणि मग गिफ्टोबा असा कार्यक्रम असतो.

इथे ईशानसाठी म्हणून २४ ला दुपारी डेकोरेशन करायचे ठरवले होते. नेमकेच त्या रात्री ईशानने आजारपण काढले. सुदैवाने त्याचे नेहमीचे डॉक्टर ऑन कॉल होते. अपॉइंटमेंट मिळाली तरी तिथून निघून पुन्हा औषधं घेऊन निघेपर्यंत बराच उशीर झाला. ९५ आमची वाट बघत थांबला होता आणि थांबलाच होता. जीपीएस काकू कधी कधी खरं बोलतात आणि त्यांचं ऐकण्यात शहाणपणा असतो. त्यांनी आम्हाला दीड तासात पोचवलं बॉ. गेल्यावर स्वागतासाठी गरम गरम हर्बाता मिओदेम सित्रेनोम (लेमन आणि हनी घातलेला पोलिश चहा) तयार होता. ट्री आधीच डेकोरेट करुन झाला होता. आम्ही त्यावरच बरोबर नेलेली ऑर्नामेंट्स जागा मिळेल तिथे लावली. गिफ्ट्स खाली मांडून ठेवली. एवढे करुन आमचे आवरुन होइतो बाकीचे दोन पाहुणे जेमा आणि रॉबर्ट आले. जेमा अमेरिकन आहे आणि ३५ वर्षांहुन अधिक काळ कनेटिकटमध्ये रहाते आहे. रॉबर्ट जर्मनीहून इंटर्नशिपसाठी गेले सहा महिने इथे आलाय.

बरोबर सहा वाजता सगळे जेवणाच्या टेबलभोवती जमले. सुरुवात अर्थातच प्रार्थनेने झाली. प्रार्थनेच्या वेळी एक खास प्रकारचा ब्रेड किंवा ख्रिसमस वेफर (opłatek) एकमेकांना देण्याची प्रथा आहे. आपल्या हातातला हा वेफर उपस्थित असलेल्या प्रत्येकासमोर धरुन पीस, हेल्थ आणि प्रॉस्परिटी मिळो अशी सदिच्छा व्यक्त केली जाते. समोरच्या व्यक्तीने त्या वेफरचा एक तुकडा तोडून खाण्यासाठी घ्यायचा. ह्या वेफरवर अतिशय सुंदर चित्र एम्बॉस केलेली असतात.

ह्यानंतर सुरु झाले मुख्य जेवण. पोलिश कल्चरमध्ये ख्रिसमस डिनर हे मीटलेस असते. फिश आणि अंड वगळता इतर कुठलेही सामीश पदार्थ ह्या दिवशी खात नाहीत. जेवणाची सुरुवात बार्श्त टर्वोनी उश्कामी (Barszcz Czerwony Z Uszkami - Beet soup with sour cabbage/sauerkraut dumplings) आणि ग्झिबोवा मकारोनेम (Grzybowa z Makaronem- Forest mushroom soup with home made noodles) ह्या दोन सूपने झाली. काही लोक सूपसोबत श्लेजें (Sledzie- Herring with onion and sour cucumber in veggie oil) सुद्धा खातात. इथे पण श्लेजें होते पण मी व्हेजिटेरिअन असल्याने केवळ सूपचा आस्वाद घेतला. मुख्य जेवणात आणि त्यानंतर डेझर्टमध्ये खालील पदार्थ होते:
_यजेनोवा सॅलड (Jarzynowa Salad- Veggie salad with mayonnaise and mustard)
_कपुस्ताज ग्रोहेम (Kapusta Z Grochem- Polish style sour cabbage with yellow split peas)
_प्येरोगी कपुस्ताम् झिबामी (Pierogi Z Kapusta- Steamed dumplings with polish style sour cabbage and forest mushrooms)
_प्येरोगी रुस्क्यिं (Pierogi Ruskie- Steamed dumplings with potatoes and cheese)
_रिबा स्मजोना (Ryba Smazona- Fried fish with bread crumbs)
_ख्लेब झिटनि (Chleb Zytni- Sour dough rye bread)
_सेरनिक (Sernik- Polish style cheese cake)
_प्येस्कोविच्छ काकाव्ह (Piaskowiec Z Kakao- Potato flour cake)
_प्येरनिकि (Pierniki- Polish style ginger short bread)

अजून एक पोलिश व्हाइट ब्रेड आणि २-३ प्रकारचे चीज होते. ह्यात अर्थातच प्रत्येक कुटुंबाची स्वतःची काही खासियत असे पदार्थ सुद्धा असतात. एवढे सगळे खाऊन झाल्यावर पुन्हा एक राउंड हर्बाता मिओदेम सित्रेनोमचा झाला.

जेवणानंतर भेटवस्तु देण्याचा कार्यक्रम झाला. ह्या सगळ्या गिफ्ट्सवर ते गिफ्ट ज्या कुणासाठी आहे त्या व्यक्तीचे ते नाव असते फक्त. सगळी गिफ्ट्स सँटाकडून असल्याचे गृहित धरलेले असते. ब्याताच्या फॅमिलीत गिफ्ट बॉक्समध्ये बर्‍याच गमतीच्या वस्तू ठेवतात. उदा: रिकाम्या फेशिअल टिशुच्या भल्यामोठ्या बॉक्समध्ये एक लहानसं मिंट चॉकोलेट. आम्हाला पण अशी मजेशीर गिफ्ट्स मिळाली. सँटा सगळ्यात जास्त प्रसन्न झाला तो ईशानवर. त्याच्यासाठी मामा, मामी, मावशी, आई, बाबा असे सगळ्यांनीच दोन-दोन तीन-तीन गिफ्ट्स आणली होती. त्याने सँटाचा ड्रेस न घालून सुद्धा सँटाचे काम अगदी चोख बजावले. तसे पण ख्रिसमस ट्री च्या एवढ्याशा पसार्‍यात घुसून गिफ्ट्स काढण्याइतका इवलुला तो एकटाच होता आमच्यात.

रॉबर्टशी बोलताना समजले की जर्मनीत सुद्धा २४ तारखेला संध्याकाळी मुख्य सेलिब्रेशन असते. प्रत्येक फॅमिलीच्या स्वतःच्या काही खास प्रथा असतात. रॉबर्टच्या फॅमिलीत २४ तारखेपर्यंत लहान मुलांना लिव्हिंग रुममध्ये प्रवेश नसतो. नवे कपडे घालून, आजी-आजोबांसोबत थेट ख्रिसमस इव्हला ती सजवलेली खोली, झगमगता ख्रिसमस ट्री आणि त्याखाली ठेवलेली आकर्षक गिफ्ट्स बघायला खूप मजा यायची असे त्याने सांगितले.

जेमाच्या फॅमिलीत ख्रिसमस डिनर दोनदा होते. एकदा ख्रिसमच्या एक आठवडा आधी जेव्हा साधारण जवळचे नातेवाईक एकत्र जमतात. ह्या डिनरला नवरा आपल्या फॅमिलीकडे जातो तर बायको तिच्या फॅमिलीकडे. तिथे सख्खी चुलत बिलत भावंडे असा जामानिमा असतो. मुख्य ख्रिसमस इव्हला फक्त इमिडिएट फॅमिली असते. नवरा-बायको, असल्यास आणि येणार असल्यास आई-वडील आणि मुलं.

माझ्या माहितीत अमेरिकेत गिफ्ट्स ख्रिसमस डे च्या सकाळी उघडतात. त्यानंतर ब्रंच अथवा लंच असते. लंडनमध्ये सुद्धा गिफ्ट्स ख्रिसमस डे च्या सकाळी उघडतात. संध्याकाळी सगळ्या फॅमिलीसोबत ख्रिसमस डिनर असते.

इतकी वर्ष ख्रिसमस तसा दुरुनच साजरा केला. ह्या दिवशी सुट्टी तर असतेच. इथे मॉलमध्ये ख्रिसमस इव्हला छान कार्यक्रम असतात. तिथे एक मोठा ख्रिसमस ट्री आणि इतर बरेच डेकोरेशन केलेले असते. लहान मुलांच्या दिमतीला एक सँटा पण असतो. मॉलमध्ये जायचे, सँटासोबत फोटो काढायचा, तिथेच X'Mas Carols ऐकायचे, घरी येताना हाय वे न घेता गावांमधून आतल्या रस्त्यांनी ख्रिसमस डेकोरेशन बघत यायचे, लोकांच्या उत्साहाचे कल्पकतेचे कौतुक करायचे असे मर्यादित सेलिब्रेशन असायचे. ह्यावर्षी पहिल्याने असा ख्रिसमस सेलिब्रेशनमध्ये भाग घेतला. ईशानने तर धमाल केलीच पण आम्ही मोठ्यांनी पण खूप एन्जॉय केले. बिलव्ड फॅमिली, पर्फेक्ट मील, लॉट्स ऑफ गिफ्ट्स अँड माय लिटल सँटा...it couldn't have been merrier!!!

विषय: 
प्रकार: 
शब्दखुणा: 

मस्त. यातले पदार्थ कधी ऐकलेही नव्हते याआधी. Happy
ब्याता अमेरिकेत वाढली की पोलंड मध्ये? एकदा तिला विचारुन पोलंड बद्दल काही लिही ना.

अरे वा मजाच आली असेल नाही ... वाचून आम्ही पण ख्रिसमस पार्टीला आल्यासारखे वाटले.. Happy
अजून फोटो असतील तर टाकाल का. ?

मस्त गं! मेन्यू जंगी आहे! मला माझ्या एका मूळच्या पोर्तुगीज व नंतर गोव्याला वसलेल्या कॅथलिक कुटुंबातून आलेल्या मैत्रिणीबरोबर साजरे केलेले ख्रिसमस आठवले! Happy गिफ्ट्स, ख्रिसमस ट्री, कॅरोल्स, मास, उत्सवाचे ते वातावरण, ख्रिसमस ट्रीच्या रोषणाई व मंद प्रकाशात केलेले स्लो डान्सिंग.... ती मैत्रीणही खूप ऐसपैस मेन्यू आखायची त्या दिवशी. त्यात भारतीय रेसिपीज, गोव्याकडच्या खास रेसिपीज, काही पोर्तुगीज व काही कॉन्टिनेन्टल पदार्थांची सरमिसळ असायची. अगदी चीझ पकौडे पासून सूप्स, अ‍ॅपल पाय, अपसाईड डाऊन पायनॅपल केक / इतर कोणताही घरी बनविलेला केक, हनी चिकन, मटण/ बीफचे प्रकार, पोर्तुगीज स्टाईलने केलेल्या भाज्या, सॅलड्स, आईसक्रीम असला जंगी मेनू असायचा. जेवायलाच दोनेक तास लागायचे! Happy शिवाय सोबत वाईन.... अगंगं..... पोट इतके तु डुं ब भरायचे की हालणेही मुश्किल व्हायचे! आणि हे सर्व पदार्थ ती एकटीने करायची.... तेही वयाच्या २२-२३ व्या वर्षी! तिला थोडीफार मदत तिची धाकटी बहीण करायची. आम्ही तिच्याकडे जेवायला आलेले पाहुणे तरंगतच घरी जायचो!

आज तुझा लेख वाचताना ते साजरे केलेले ख्रिसमस आठवले. ह्या वरच्या मेन्यूतील प्यिरोगी हा प्रकार माझ्या काही पोलिश मैत्रिणींच्या कृपेने मी चाखला आहे. छान लागतो.

पोलिश ख्रिसमस. छानच वाटलं वर्णन वाचून सिन्डरेला.

यूथ होस्टेलच्या गोवा कोस्टल कर्नाटक ट्रेकच्या वेळी आमच्यासोबत फिलोमिना नावाची एक कॅथॉलिक मुलगी होती. २४ डिसें.च्या सकाळी बेनॉलिमला आमचा ट्रेक संपला. तिथून जवळच तिचं घर होतं. मग तिने तिच्या घरी आम्हाला ख्रिसमस साजरा करायला बोलावलं होतं. खूप उत्साही कॅथॉलिक फॅमिली होती त्यांची. शिवाय धार्मिक. त्या दिवशीची आठवण झाली. त्यांचं घर इतकं इतकं सुरेख होतं! जुन्या पोर्तुगिज व्हिला स्टाइल. स्टेन्ड ग्लास खिडक्यांसकट. जेवणात पेरुच्या जेलीचं एक स्वीट होतं घरी बनवलेलं ते आणि त्यांचा स्पेशल विन्दालू (तिखटजाळ)आठवतय.

सुपर्ब, ख्रिसमस.. Happy

माझा मित्र जेरी जॉर्ज च्या घरचा ख्रिसमस एवढा भारी नव्हता. पण त्याचा आज्जीने सांगितलेल्या ओल्ड गोव्याचा अन ख्रिसमसच्या आठवणी एकदम क्लास होत्या.

सामूहीक गायन, नृत्य .. टिपीकल गोवन भाषेतली ख्रिसमस गाणी , केक्स , चॉकलेट्स, ख्रिसमस ट्री, गोवन पोषाख सगळं काही अफलातून वर्णन ऐकलं तीच्याकडून. Happy

मस्त वर्णन सिंडे Happy गणपतीच्या उल्लेखावरुन वाटतंय तुझी ब्यातावहिनी आपले सण पण साग्रसंगित करत असावी. त्या एम्बॉस केलेल्या वेफरचा फोटो हवा होता, काय प्रकरण आहे ते कळलं असतं.

सिंडे, लेख छान झालाय. बर्‍याच नव्या पदार्थांची नावं कळली. (आता यो. जा. फोटोंसह पा. कृ. टा.) Happy

क्रिसमसट्री सुंदर नटवलंय.

दरवर्षीचा नाताळ असाच मेरिअर जावो. Happy

वाचलं गं ब्लॉगवरचंही. फोटो छान आहेत. तिकडे प्रतिक्रिया अपलोडच होत नाहिये म्हणून इथे परत येऊन देतेय Happy

मस्त लिहिलंय. Happy

ब्याता अमेरिकेत वाढली की पोलंड मध्ये? एकदा तिला विचारुन पोलंड बद्दल काही लिही ना >>> रैनाला अनुमोदन. हे वाचायला आवडेलच.

सुंदर लिहिले आहेस. खूप छान वाटलं वाचून Happy
रैनाला माझेही अनुमोदन. अजून खूप लिही पोलंडबद्दल, ब्याताबद्दल Happy

मस्त वर्णन. मुलांच्या आनंदाने अगदी चार चांद लागतात अश्या सेलिब्रेशनला. वहिनी ग्रेट आहे तुझी. I felt very warm inside just after reading this. प्येरोगी चा संदर्भ मेन इन ब्लॅक वन मध्ये आला आहे. तेच हे का? असेच खूप ख्रिसमस तुमच्या आयुषयात येवोत. पुणे गटग मध्ये पण सचिनमामा व मी तुझी आठवण काढली होती.

आहहा..सिंडी मस्त वाटलं वाचतांना.. सर्व प्रसंग (मायनस पदार्थ Wink ) डोळ्यासमोर आले
मुलांची काय मज्जा असते ना सणांच्या दिवसात.. सर्वच सण असेच आनंदाने साजरे करा
माझ्या सर्वच मैत्रीणी किरिस्ताव असल्याने हे सोहळे खूप एन्जॉय केलेत लहानपणी.. पोलिश आयडिया मात्र एक्दमिश युनिक
जीपीएस काकू कधी कधी खरं बोलतात- अगदी !अगदी!! Lol

Pages