अफवा

आज संध्याकाळी रस्त्याने चालताना आमच्या फेवरेट ' भट ' साहेबांच्या ' राज ' या ' अति भयंकर ' शिणेमातले ' आपके प्यार में, हम सवरने लगे' हे दर्दभरे गाणे कानी पडले अन् मन थेट 23 वर्षे मागे गेले.

त्यावेळी आमच्या गावात या चित्रपटासोबत एक ' अफवा ' पण रिलीज झाली होती.

जो माणूस हा चित्रपट रात्रीचा 9.30चा शो एकटा पाहील, त्याला 1 लाख रुपये इनाम मिळेल.

..... आणि

एका माणसाने रात्री तसा तो शो पाहिलाही, अन् त्याला ते 1 लाख रुपये मिळालेही, मात्र ते घ्यायला तो जिवंत नव्हता....!

अफवा

असते झटकन पसरणारी 
हातपाय नसलेली अफवा,
होत्याचं नव्हतं करणारी
गैरसमज पसरवते अफवा !

अंधश्रद्धेला कारण होते 
दंगल घडविते ती अफवा,
बऱ्याचदा स्वार्थासाठीच
पसरविली जाते अफवा !

मुलांची चोरी, देव देवस्की
म्हणणारी खोटीच अफवा,
मना मनात किंतु परंतू व
केवळ भ्रम वाढवी अफवा !

निरपराधाचा जीव घेणारी
पसरू देऊ नका अफवा,
वेळीच करून सर्व खात्री  
मोडूनच काढा या अफवा !
©शिवाजी सांगळे
मो.९५४५९७६५८९