पाककृती स्पर्धा-३ -मिलेट्स पाकृ- नाचणीचे कांदे पोहे – मानव

काल अमांच्या मिलेट पुलाव धाग्यावर विषय निघाल्याने संध्याकाळी दुकानात गेलो तेव्हा नाचणी पोह्यांचे पाकीट बर्‍याच दिवसांनी आणले. नेहमी यांचा पातळ पोह्यांचा चिवडा करतो तसा करायचो, पण या पाकीटावर कांदे पोहे सारखी पाकृ लिहिलेली दिसली तेव्हा आज सकाळी नाश्त्याला तसेच करायला घेतले.
जवळपास तयार होत आले तेव्हा क्लिक झाले की अरे हे तर माबोच्या मिलेट्स पाकृ स्पर्धेत मोडतील.
पण तयारीचे, मधले फोटो काढले नव्हते, भांडी हाताला लागतील ती घेउन वापरली होती. तरीही कढईत असताना एक फोटो आणि प्लेटमध्ये घेतल्यावर एक फोटो काढुन घेतला.
फोटो वाड्यावर पोस्ट केला तिथे चांगले दिसताहेत म्हणुन मृणालिनी आणि अमांनी सांगीतले.
मग विचार केला शेवटी ही स्पर्धा म्हणजे मिलेट्सच्या जागरुकतेसाठी एक मोहीम आहे (टाळ्या वाजवा काहीजण), स्पर्धेसाठी नव्हे तर या मोहीमेसाठी सादरीकरणासारख्या गौण बाबींना अजिबात महत्व न देता केले त्या अवतारात सादर करणे हे एका जागरुक नागरीकाचे कर्तव्यच नव्हे काय?. (परत थोड्या टाळ्या येऊ द्या).
मग तडक पाकृ लिहायला बसलो.

तर ..

हे नाचणीचे पोहे:

.

कृती:

कढईत तेल तापवून मोहरी, ते तडतडलेकी जीरे, ते तडतडले की शेंगदाणे घालुन मिनिटभर परता. मग हिरवी मिरची आणि कांदा घाला, मीठ घाला. कांदा सोनसळला की हळद घालुन मग त्यात कोरडेच नाचणीचे पोहे घालुन चार पाच मिनिट परता.

मग साधारण पाव कप पण अंदाजाने पाणी शिंपडुन हलवा, सगळे पोहे ओलसर आणि मऊसर व्हायला हवेत, याला साधारण मिनिटभर लागतो. मग गॅस बंद करुन लिंबु पिळुन आणि कोथिंबीर घालुन मिसळुन घ्या. वर खोबरे पण घाला ( मी ते विसरलो.)
नाचणीचे कांदे पोहे तयार आहेत.