नजर

जगावेगळे मागणे मागते मी
मला शोध तू, फक्त तू! - हरवते मी!

पुन्हा रंग येतो नव्याने ऋतूंना
पुन्हा फूल होऊन गंधाळते मी

कवडसे, झुले, आरसे, बंद खोल्या
अशा चौकटींशीच सैलावते मी

असा मान आहे समाजात मजला -
नजर चुकवते, झेलते, सोसते मी!

नभातून येते खुळी हाक त्याची
उभी स्तब्ध जागीच नादावते मी

जरी करपते रोज मेंदी चुलीवर
बिछान्यातला चंद्र सांभाळते मी

असे साचले काय आहे तळाशी
अशी का सतत खिन्न फेसाळते मी?

कधी एकटी भांडते मी स्वतःशी
अखेरी स्वतःलाच समजावते मी

जीवनात फ़ुलविते नवा बहर
खोल खोल आतवर तुझी नजर

मी नशेत राहतो असा सदा!
नयन की तुझे प्रिये असे जहर?

'बिलगशी कितीक रे तिला असा!!
पावसा!! पुरे अता तुझा कहर!!'

का मिठीत येत लाजतेस तू??
का हळूच कंप पावती अधर??

लाजताच तू अशी पुन्हा पुन्हा
अंतरात खोल का उठे लहर

मी कितीक दूर चाललो जरी
भेटते तुझेच नाव अन शहर

साथ दे मला तुझी अशी सखे
मिसळुदे मला तुझ्या स्वरांत स्वर

-प्राजु