शशक स्पर्धा - चीकू - बिग बॉस

नोकरीचा पहिला दिवस. तो उत्साहाने बॅज स्वाईप करून आत आला. सगळीकडे शुकशुकाट. तो गोंधळला. दिवस बरोबर होता. आज सुट्टीही नव्हती. सांगितलेल्या वेळीच आला होता. बॅजही चालत होता.

अचानक एक महिला सिक्युरिटी ऑफिसर त्याच्या दिशेने येताना दिसली.

'बाहेर निघा!' तिने फर्मान सोडले.

'अहो नोकरीचा पहिला दिवस. बॅज बघा, बॉसना बोलवा.'

'कोणीच नाहीये इथे!'

'म्हणजे? गेलेत कुठे सगळे?'

'घरी पाठवलंय. आज बाहेरच्या देशातून महत्वाचं डेलिगेशन येतंय कंपनीबरोबर बिझनेससाठी. सगळ्याच बायका. त्यांनी रिक्वेस्ट केलीय त्यांच्या प्रथेनुसार त्यांना कोणी पुरुष दिसायला नकोय. पाचशे लोकांच्या कंपनीत मीच एकटी बाई. तेही बाप इथे ड्युटीवर असताना गेला म्हणून नाईलाजाने घेतलेली. आज मीच बिग बॉस बिझनेसची बोलणी करणारी!'