पाककृती स्पर्धा क्रमांक ३ (चवींचा त्रिवेणी संगम) - स्वाती_आंबोळे - नॅस्टर्शियम टी

नॅस्टर्शियम्स खरंतर आमच्या बागेत आले ते रखवालदार (ट्रॅप क्रॉप) म्हणून. त्यांच्या मिरमिरत्या चवीमुळे ते उपद्रवी किडामुंगी, ससे, खारोट्या इत्यादींपासून आमच्या लाडाच्या मोगर्‍या आणि गुलाबांचं संरक्षण करतील म्हणून. संरक्षण फारसं झालं नाही, पण बागेत रोज रंगांचा अक्षरश: उत्सव मात्र सुरू झाला.
सहसा माझा ओढा रंगीत फुलांपेक्षा गंधित फुलांकडे अधिक असतो, पण यांच्या रंगसंगतीचं माझ्यावरही गारुड झालं!

नेटवर शोधलंत तर हे दक्षिण अमेरिकेतून आलेलं वाण किती बहुगुणी आहे हे लक्षात येईल. त्याची पानं, फुलं, देठं, बिया, सगळं खाद्य आहे. त्याला सॅलडमध्ये घालतात त्या वॉटरक्रेससारखी काहीशी तिखट, मिरमिरती चव असते. कच्चं खा किंवा परतून/शिजवून खा. त्यात औषधी गुण आहेत. श्वसनाच्या विकारांवर आणि काही इन्फेक्शन्सवर घरगुती उपाय म्हणून यांचा काढा पितात. मला विचाराल तर अर्धी दुखणी नुसत्या दर्शनमात्रे पळतील असं यांचं रूप आहे!

त्यामुळे ही स्पर्धा जाहीर झाल्याबरोब्बर कधी एकदा ही पानांमागून आलेली तिखट फुलं मिरवते असं मला झालं होतं! आज योग आला!

पाककृती म्हणण्याइतकी अवघड कृती नाही.
घटक : नॅस्टर्शियमची फुलं, दालचिनीचा तुकडा, लिंबू, मध

फुलं देठांसकट तोडून आणून पाण्याखाली धुवून घेतली.

दालचिनी घालून पाणी उकळलं, ते गरम पाणी या फुलांवर ओतलं आणि दोनेक तास मुरू दिलं.

मग गाळून घेऊन त्यात लिंबाचा रस आणि मध घातला आणि फोटो सेशन केलं.

पिताना पुन्हा थोडं गरम करून घेतलं, पण रूम टेम्परेचर किंवा गारही छान लागेल.
यात आवडत असेल तर स्पाइस्ड रम गोत्र जमवेल असं वाटतंय - तो प्रयोग रात्री करणेत येईल.