जिन्नस एक, पदार्थ अनेक - सावली - पोह्यांस कारण की...

पोह्यांस कारण की...
सिरॅमिकच्या चार प्लेट्स वरून काढून त्यांचे दर्शन घडवणे!!

नरकचतुर्दशीच्या दिवशी पोह्यांचा नैवेद्य असतो.
त्यात पोह्यांचा चिवडा, दही पोहे आणि गोड पोहे असतात.
म्हणजे तीन पदार्थ झालेच ! असा विचार करून पोहे हा जिन्नस निवडला.
त्यात दही पोहे खूप आवडीचे आहेत , खूप भूक लागली तर पटकन करून खाता येतात आणि पोटभरीचे होतात
पण चिवडा करायला पातळ पोहे आणले नाहीत म्हणून बेत थोडा बदलून टाकला.

तर आज या प्लेट मध्ये आहेत.
कांदे पोहे
काकडी पोहे
अद्रकवाले दही पोहे
गोड पोहे

यात अजून अनेक प्रकार करता आले असते . कोळाचे पोहे, कुरकुरीत पोहे, तिखटमीठाचे पोहे, वगैरे जे वेळेअभावी केले नाहीत

---------------
कांदे पोहे
सोपीच नेहमीची रेसिपी. शेंगदाणे वेगळे तळून घातले आहेत.

----------------
काकडी पोहे
दीड ते दोन वाटी पोहे धुवून, पाणी निथळून
एक काकडी किसून
पाव कांदा अगदी बारीक चिरून
दोन चमचे शेंगदाणा कूट
एक दोन मिरच्या बारीक चिरून
एक चमचा ओले खोबरे - ऑप्शनल
चवीपुरती साखर मीठ
अर्धे लिंबू

सगळ्या गोष्टी एकत्र मिक्स करून त्यावर दडपे पोह्यांसाठी वजन ठेवतो तसे ठेवून द्यावे. दडप्या पोह्या इतका वेळ लागणार नाही. दहा मिनिटे पुरतील.

--------------
अद्रकवाले दही पोहे
दीड वाटी पोहे धुवून , निथळून
दोन मोठे चमचे दही
थोडं आलं किसून
कोथिंबीर बारीक चिरून
मीठ चवीपुरते
थोडे काळे मीठ किंवा चाट मसाला
डाळिंब - ऑप्शनल

सगळे जिन्नस एकत्र करून कालवायचे. दही पोहे तयार.
डाळिंब घरात नव्हते पण ते एकत्र करून फार छान लागते
त्यामुळे डेकोरेशन ब्लू बेरीज वापरल्या.

--------------
गोड पोहे
दोन ते तीन मोठे चमचे तूप
एक वाटी कोरडे पोहे
बारीक ब्राऊन साखर किंवा पिठी साखर.

छोट्या कढल्यात तूप गरम करावे.
कडकडीत तापले की पोहे टाकून मिक्स करावे
पोहे थोडे तळले जाऊन फुलतील.
त्यावर पिठी साखर किंवा बारीक साखर घालून नीट ढवळून गॅस बंद करावा.
काही मिनिटात थंड व्हायला लागले की जास्त कुरकुरीत होतात.