पाककृती लेखन स्पर्धा - आम्रसांदणी - स्वाती आंबोळे

अजूनही चुकवून दाखवा, आम्रसांदणी सोपी आहे
जुनीच आहे पाककृती, पण लिहिण्याची ढब ताजी आहे

रवा छान बारीकच कपभर, खमंग भाजा शुद्ध तुपावर
रंग गुलाबी, खरपुस दरवळ हीच कसोटी त्याची आहे

ताटलीत पसरून निवू द्या, तोवर कपभर आम्रस काढा
रेष-न्-रेष रसातिल आता गाळुन काढायाची आहे

दही घट्ट घाला अर्धा कप, मिश्रण घुसळुन एकजिव करा
निवलेला मिसळून रवा, मग साखर घालायाची आहे

मीठ चिमुटभर घालुन, ढवळुन, दोन तास हे मुरवत ठेवा
दूध घालुनी कन्सिस्टन्सी ॲडजस्ट करायाची आहे

इडलीपात्री भरून मिश्रण वीस मिनीटे वाफवून घ्या
तुपासवे खा, नादुसवे खा, आम्रसांदणी रेडी आहे!

लेखनप्रकार : ग़ज़ल, स्वरयमक
तळटीप : 'लेखन पूर्वप्रकाशित नसावे' म्हटलंय नियमांत, 'पाककृती पूर्वप्रकाशित नसावी' म्हटलं नाहीये, त्यावर विसंबून ही प्रवेशिका देत आहे.