पाऊस

_ पाउस ओली माती
उलगडती नाजुक नाती
नाजुकशा कमलदलावर
जणु इवले इवले मोती

पाऊस मखमली हिरवळ
जणु चुडा ल्यायली धरती
अन् पानांपानांमधुनी
डोकावे श्रावण मूर्ती

_ पाउस सागर भरती
लहरी त्या नर्तन करिती
स्पर्शण्या पूर्ण चंद्राला
उसळती धुंद त्या वरती

_ पाउस भिजली सृष्टी
ती सतत अनाहत वृष्टी
नवनवोन्मेष अंकुरले
पाहता तृप्तली दृष्टी

---------------------------------------------

टीप : काही ठिकाणी पहिली मात्रा सोडली आहे. त्यामुळे तेथे _ चिन्ह वापरले आहे.