इंडिया आणि भारत

चमचम करतो जिथे इंडिया, भारत खातो ठोकर आहे
श्रीमंतीच्या सत्तेमधला भणंग इथला वोटर आहे

रिते बंगले गच्च झोपड्या दरी वाढली दोघांमधील
त्याच्या हाती पिझ्झा, याच्या स्वप्नीसुद्धा भाकर आहे

राम उपाशी, रहीम उघडा माणसातला कुणा दिसेना
पण मूर्तीवर चढते सोने, दर्ग्यावरती चादर आहे

कृषीप्रधानी देशामध्ये भाव पिकाला कसा मिळेना ?
इथे जगाच्या पोशिंद्यावर का कर्जाचा डोंगर आहे ?

इथे तिरंगा विकण्यासाठी सिग्नल वरती उभे लेकरू
संविधान अन् हक्काचा मग टीव्हीवरती जागर आहे

ग्रंथ एकदा वाच जरा तू इतिहासाला समजायाला
भाषण केवळ घागर वेड्या, पुस्तक म्हणजे सागर आहे

कुठे लिहाया जमते मजला शब्दामध्ये भळभळ सारी
तुटकी फुटकी कविता माझी जखमेवरची फुंकर आहे

- किरण कुमार