कधी थांबता सांज

Submitted by द्वैत on 11 December, 2025 - 05:24

कधी थांबता सांज या उंबऱ्याशी
कुठे दूरदेशी झरे पापणी
किती सावरू पाहिले अंबराला
कळेना तरी का तुटे चांदणी

व्यथा आपुली गे नभाला कळावी
असे सूर छेडू नको साजणे
दब्या पावलांनी किती चालशी तू
कुठे ना कुठे वाजती कंकणे

तुला पाहतो मी मला पाहशी तू
असे भास नाही जगावेगळे
रुजावे फुलावे पुन्हा उन्मळावे
सुरू राहती हे ऋतू सोहळे

द्वैत

विषय:

Groups audience:

Group content visibility:

Public - accessible to all site users

शेअर करा