शशक २ - पिंडऱ्या - माबो वाचक

“मला वाटलं नव्हतं, तू कधी असा वागशील, मास्तरा” गावातलीच कोणी बाई मास्तरांच्या समोर उभी होती.
“आरं समद्या गावाला शानं कराया आलतास नव्हं, आन सवताच बाईच्या नादी लागलास? आरं पुस्तकं वाचणारा तू, बोर्डावर तुणतुणं वाजवाया लागलास? थू तुझ्या जिंदगानीवर” असे म्हणून ती पाचकन मास्तरांच्या तोंडावर थुंकली.
मास्तर धडपडत स्वप्नातून जागे झाले. त्यांच्या अंगाला दरदरुन घाम फुटला होता. त्यांनी आजूबाजूला पहिले अन शेजारीच पडलेली दारूची बाटली उचलून तोंडाला लावली. दारू हळूहळू शरीरात मुरत गेली आणि मास्तरांना डोळ्यासमोर गोऱ्यापान पिंडऱ्या दिसू लागल्या. त्यांच्या चेहेऱ्यावर स्मित पसरले.

शेजारच्याच फडातून गाण्याचे शब्द झिरपत होते, “अवं दाजिबा, गावात होईल शोभा, हे वागणं बरं नव्हं….”