फाया

"कृबु (*)व्यापित या जगी अता तुज स्थान काय उरते ?
मनात येण्याची खोटी : मग इच्छित अवतरते !
काव्य, नाट्य, शिल्पे, चित्रे अन् जटिल अधिक काही
गरज तुझी यासाठी कशाला? कृबुच सर्व देई !"

कठोर शब्दे मानवी प्रतिभा दुःख मग्न झाली
नवक्षितिजांना ओलांडुन कृबु पार पुढे गेली
हताश होत्साती प्रतिभा क्षण-भर निष्प्रभ झाली
पुन्हा सावरून मनात काही जुळवून मग वदली,

"कृबुवरती स्तुतिसुमने उधळीत होऊ नको दंग
कारण विरहित कार्य कधीतरी असते का सांग ?
नसेन जर का मीच मानवी सृजनाचा पाया
नसेल माझे अत्तर तर कृबु कोरडाच फाया"
~~~~~~~~~~~~~~~~~~
(*) कृत्रिम बुद्धिमत्ता
फाया: अत्तर लावण्यासाठी वापरला जाणारा कापसाचा बोळा