ढेरी पॉमपॉम

ढेरी पॉमपॉम

----------------------------------------------------------------------------------

माझी आई मला ना ढेरी पॉमपॉम म्हणते . असं म्हणतात का एखाद्याला ? आता आहे माझी ढेरी पॉमपॉम ! थोडीशी मोठी . थोडीशी गोलगोल .

मला नाही आवडत असं . ती ना थोडीशी खोडकर आहे . पण काय करणार ? आईसाहेब आहेत ना . हा शब्द मी कुठून घेतला ? तर - बाबा तिला बाईसाहेब असं म्हणतात .

अन गंमत सांगू ? - खरं तर बाबांची ढेरी तर जाम पॉमपॉम आहे . मग ती त्यांना असं म्हणत नाही ते . पण मी म्हणते बरं का बाबांना - ए ढेरी -ए पॉमपॉम ! पण ते ना माझ्यावर रागवत नाहीत .

पण एकदा गंमत झाली . आई त्यांनाही म्हणाली - ढेरी पॉमपॉम ! बाबा फक्त हसले . म्हणाले - असं आहे काय ? आता मी व्यायाम करतो . आणि जादू - पोट आत !

ते असं म्हणतात . करत काहीच नाहीत . मला माहितीये ना . पण एक गोष्ट आहे . आई त्यांना असं म्हणाली , ते मला नाही आवडलं .

पण देवाला सगळं कळतं . दुसऱ्यांना त्रास दिला की तो ... बरोबर शिक्षा करतो !

आणि मला असं लक्षात आलं की आईची ढेरीपण पॉमपॉम झाली आहे . पण मी काही बोलले नाही . आणि बापरे ! ती ढेरी पॉमपॉम झाली आणि आणि - ती पॉम पॉम पॉम झाली !

तेव्हा मला राहवलं नाही . मी चिडवलं तिला तसं . तेव्हा ती हसली . तिने मला जवळ घेतलं . माझा पा घेतला .मला असं आवडतं , बरं का ? मग काय म्हणाली ती, माहितीये ?

म्हणाली - आता आपल्याकडे एक नवीन बाळ येणार आहे . तुझ्याशी खेळायला .

अच्छा ! अस्सं होतं . आईच्या पोटात बाळोबा बसले होते . आणि म्हणून तिची ढेरी पॉम झाली होती तर . हे मला नवीनच कळलं .

मला तर एकदम मज्जा वाटली . खूप आनंद झाला . मग मी पळत बाहेर गेले . मला काय करावं तेच कळेना . मग मी गोलगोल फिरले . उड्या मारल्या . मग दमले, तेव्हा एका जागी बसले . छान छान कविता म्हणल्या .

मग मी विचारात पडले . मला त्या बाळाशी खेळावं लागणार . पण ते काही लगेच खेळणार नाही . मग आधी त्याला गाणीबिणी म्हणून दाखवावी लागणार . त्याच्याशी बोबडं बोबडं बोलावं लागणार .

पण काय झालं माहितीये ? माझ्या मनात आणखी एक विचार आला - त्या नवीन बाळाची ढेरी पॉमपॉम असली तर ? ...

हुय्या ! माझ्या जोडीला आणखी एक ढेरी पॉमपॉम !

--------------------------------------------------------------