लहान मुलांच्या बर्थ डे पार्टीला तुम्ही कोणते खेळ खेळता?

लहान मुलांच्या बर्थ डे पार्टीला तुम्ही कोणते खेळ खेळता?

सर्वांनी एकमेकांकडील गेम आणि आयड्या ईथे शेअर करूया आणि सर्व ज्युनिअर मायबोलीकरांची पार्टी रॉकिंग आणि त्यांचे आयुष्य आनंदी करूया!

ईथे मोठ्यांचे फॅमिली गेम्स आले तर ते सुद्धा चालतील. शेवटी अश्या पार्टीजना मोठ्यांनीही लहान बनूनच एंजॉय करायचे असते.

--------------

आमच्याकडे आजवर खेळले गेलेले खेळ.
(आमच्या सोसायटीत मुलांची कमी नसल्याने अगदी ऐन परीक्षेत वाढदिवस आला तरी २५-३० मुले सहज जमतात. त्यामुळे काहीही खेळले तरी दंगा हमखास असतो. उलट दंगा अति होऊ नये याची काळजी घेऊन खेळ निवडावे लागतात)

१) पासिंग द पार्सल - तोच आपला हम आपके है कौन माधुरीवाला. उशी पास करायची आणि ज्यावर राज्य येईल त्याला काहीतरी मनोरंजक आयटम सादर करायला लावायचे.

२) एक मिनिट गेम्स - यात बरेच काही खेळलो आहे. जसे की,
ग्लासवर ग्लास रचणे.
फुगे दोन काड्यांनी उचलून इथून तिथे नेणे,
बादलीत बॉल टाकणे,
जोडी बनवून कॅच कॅच खेळणे,
आठवेल तशी भर टाकतो.

३) रिंगमधून किंवा दोरी खालून बॉडी टच न करता पास होणे. (यात आमची पोरगी बारीक आणि लवचिक असल्याने बरेचदा जिंकायची. म्हणून घरच्या वढदिवसाला कधी खेळलो नाही)

४) रॅम्प वॉक - फॅशन शो - हौस असते लहान मुलामुलींना

५) स्टॅच्यू - नाचता नाचता नाचता म्युजिक थांबली की लगेच आपणही थांबायचे. ज्या खेळात नाच असतो तिथे मजा येतेच.

६) उड्या मारता मारता म्युजिक थांबताच खाली बसायचे. जो शेवटी बसेल तो बाद. अश्या खेळात जजगिरी फार करावी लागते त्यामुळे पुन्हा खेळायचा नाही हा अनुभव घेतला. तरी एक बरे मी विडिओ काढायचो त्यामुळे बरेच गोष्टी दूध का पाणी करता यायच्या.

७) म्युजिक लाऊन नाचायचे, किंवा सर्कल करून गोल गोल फिरायचे आणि जो नंबर पुकारला जाईल तितक्या मुलांचा आपसात ग्रूप बनवायचा. फार लफडे होतात पोरांचे. आपले खरे खोटे मित्र समजून जातात.

८) शिवाजी म्हणाला.. सायमन से.. जुनाच खेळ आहे पण आपल्या मनाने एक दोन उलट सुलट रुल टाकायचे आणि फास्ट खेळायचा..

९) Chinese Whispers - हा गेम खेळायला फारच धमाल आलेली. सगळ्यांनी रांगेत पाठमोरे उभे करायचे. पहिल्याला मग समोर बघायला लाऊन काहीतरी अ‍ॅक्शन करून दाखवायची. ती त्याने त्याच्या मागच्याला, मागच्याने त्याच्या मागच्याला ... असे एकेकाला पलटत ती अ‍ॅक्शन पुढे पास करत जायची. शेवटच्या मुलापर्यंत पोहोचेस्तोवर मूळ अ‍ॅक्शनचे बारा वाजलेले असतात. मुले फार एंजॉय करतात. पुर्ण वेळ हसणे चालूच राहते. याचा छान विडिओ सुद्धा काढायचा.

१०) एखाद्या वस्तूचे नाव घ्यायचे, जसे की दोन रुमाल, दहा रुपयाची नोट, लाल हेअर बॅण्ड... आणि ती वस्तू जो पहिला आणेल त्याला तिथल्या तिथे एक चॉकलेट

११) चित्र बघा शब्द ओळखा - हा खेळ आम्ही फॅमिलीसोबत खेळलो आहे. सध्या मुलगी आणि तिच्या मैत्रीणी मोठ्या झाल्याने यंदाच्या वाढदिवसाला खेळणार आहोत.
यावर ईथे धागा काढलेला. - https://www.maayboli.com/node/80918
सोसायटीतील मुलांचीच नावे, त्यांच्या मध्ये फेमस असलेले कॅरेक्टर, शब्द ठेवले तर त्यांना मजा येईल असे वाटतेय.

१२) एक मछली... पाणी मे गयी.. छप्पाक - अधिक माहितीसाठी रील बघा याच्या. सोसायटीमधील मुलांमध्ये सुद्धा ट्रेण्डिग असल्याने हा सुद्धा सध्या खेळायचा विचार आहे. याचा विडिओ सुद्धा मजेशीर बनेल, जो त्यांनाच बघायला आवडेल.

१३) Who knows Birthday boy/girl better - यात ज्याचा वाढदिवस आहे तो आपल्याबद्दल काही प्रश्न विचारणार.. जसे की माझा फेवरेट हिरो. कार्टून, रंग... वगैरे वगैरे... आणि जो कर्रेक्ट उत्तर देणार त्याला तिथल्या तिथे चॉकलेट. हा आम्ही फॅमिलीमध्ये खेळलो आहोत. मजा येते. यावेळी वाढदिवसाला हा खेळ खेळायचा विचार आहे.

१४) संगीत स्टेशन - माझ्या काही फारसा आवडीचा गेम नाही. पण साधा सोपा सहज आहे. मुलांना नाचायला आणि कोणाची चिट्टी येत कोण बाद झाला हे बघायला मजा येते.

१५) एक चटई असते. ज्यावर उलटे सुलटे हातापायाचे निशाण असतात. त्यावर त्यानुसार आपले हातपाय चिकटवत उड्या मरत इथून तिथे जायचे असते. मागच्या एका वाढदिवसाला ट्रेंडिंग असल्याने हे खेळलो होतो. आमची चटई असल्याने आमच्या घरच्या मुलांनीच पटापट उड्या मारल्या. म्हणून त्यांना बक्षीस दिले नाही.

चटचट आठवले, ज्यांचा स्वानुभव आहे ते पटपट लिहिले.. अजून ईतरांच्या बर्थ डे पार्टीत पाहिलेले आठवून प्रतिसादात भर टाकत जाईन.. जगभरात असे शेकडो खेळ खेळले जात असतील.. येऊ द्या