कुणी खास नाही

कसे व्यक्त व्हावे? कुणी खास नाही
जराही दिलासा उसास्यांस नाही

वने संपली दु:ख रामास नाही
पुनर्जन्म झाल्यास वनवास नाही

मुले वेगळी नांदती माय सोडुन
कुणाचा कुणाला तसा त्रास नाही

अपेक्षा कुणापासुनी का करावी?
जिथे आपुला येत कामास नाही

सदा दु:ख अन् वेदना भोगल्याने
भविष्यात मोठी मनी आस नाही

कसा काय शहरात आराम मिळतो?
जिथे घ्यावया मोकळा श्वास नाही

दिखाऊच येथे थवे माणसांचे
जणू झेनियाची फुले, वास नाही

न गोठा न गाई, न बछडे न शेती
कणालाच ठाऊक गोग्रास नाही

करा नाच नंगा खुला माजल्यांनो
अता शाप देणण्यास दुर्वास नाही

कसा काय "निशिकांत" हसतोस इतका?
जरी भोगला मस्त मधुमास नाही

निशिकांत देशपांडे., पुणे.
मो.क्र. ९८९०७ ९९०२३
वृत्त--भुजंगप्रयात
लगावली--लगागा X ४