Submitted by निशिकांत on 1 March, 2022 - 09:02
बाग ना फुलली तरी गंधित हवा येते कशी?
बांधला अंदाज की आली असावी उर्वशी
सभ्यही बघती तिला चोरून, राखित सभ्यता
पण बिचारे पाहुनी हसणे तिचे, पडती फशी
मुक्त छंदातून लिहिणार्या कवींनाही अता
पाहता तिजला गझल वाटे लिहावी छानशी
पैंजणांचे वाजणेही सांगते कानात की
सोड तू वेड्या तपाला, जिंदगी जग अल्पशी
व्यस्त असते समिकरण का रूप अन् वय यातले?
कैक वर्षांपासुनी दिसते जणू ती षोडशी
वाढली वर्दळ जशी ती लागली उमलायला
का अडोशाला जगावे, माय सांगे तिज जशी ?
आड आहे, पण भुतांचा, सांगते ती अंगणी
ग्रासता नैराश्य केली रोमिओंनी खुदकशी
भाग्यशाली तोच ज्याची जाहली ती शेवटी
प्राक्तनी इतरास बघणे फक्त स्वप्ने धुंदशी
लेखणी "निशिकांत"ची थकली तिला रेखटता
शेवटी इतकेच लिहिले "रूप ते बावनकशी"
निशिकांत देशपांडे, पुणे.
मो. क्र. ९८९०७ ९९०२३
वृत्त--देवप्रिया
लगावली--गालगागा X ३ = गालगा
विषय:
Groups audience:
Group content visibility:
Public - accessible to all site users
शेअर करा
