अरे पाखरांनो..

अरे पाखरांनो.. नका दूर जाऊ,
नका झेप घेऊ अनंताकडे !!
इथे माय तुमची सुगंधास बिलगून
गिरवीत आहे फुलांचे धडे !

तिला सावरा, आवरा भोवरा तो..
तिने जो मनाच्या तळी ठेवला !
दिसावे, कळावे तरी खोल जावे !
तिच्या सावलीचा असा मामला !!

नदीला कधी भार झाला जळाचा?
तिच्या काजळाचा तुम्हाला टिळा !
अरे दग्धजांनो ! नका पाप लावू..
तिला.. सोसल्या ज्या मुलीने कळा !!

पिलांनो जरा आठवा, बालवेळी
तुम्हा कोवळे पंख दिधले कुणी !?
कुणी पाळणा झुलवीला सांजवेळी?
तुम्हाला जगाया शिकविले कुणी !?

घडीने घडी काळ आयुष्य नेतो..
असे रामदासा जरी वाटते,
अरे त्या घडीचे किती दुःख मोठे !
जिला माऊलीची चिता पेटते !!

.........................................