येते मला लिहाया

झालोय आज मोठा शायर टिका कराया
गागाल गाल गागा येते मला लिहाया

जो जो भडक खयाली, ईर्शाद त्यास मिळती
ऐकून दाद लिलया लागे नशा चढाया

झेंडा कधी स्वतःचा मिरवावयास त्यांनी
गझला बटीक केल्या झोतात वावराया

हळकुंड दीड पुरते पिवळे धमक बनाया
सिंहासनी बसोनी का लागती उडाया?

गागाल गा च आहे सगळीकडे परंतू
हा श्वास शायरांचा! नसतो कुणा हसाया

ही रीत वादळाची घोंगावते नि जाते
असते कुठे टिकाऊ? ते लागते शमाया

त्यांची बरोबरी का "निशिकांत" तू करावी?
कासव बनून पुढती जा मार्ग तू क्रमाया

निशिकांत देशपांडे, पुणे.
मो. क्र. ९८९०७ ९९०२३