मायबोलीचे मोबाईल अॅप (अँड्रोईड + आयओएस) सर्वांसाठी उपलब्ध आहे.
आरोपी
आयुष्याला कंटाळलाय तो . नको झालं त्याला जगणं . त्याने दावं घेतलं , फास बनवला . पंख्याला लटकवला . स्टुलवर उभारला . गळ्यात अडकवला . तो स्टुल पायाने ढकलला . फास आवळला . श्वास कोंडला . त्याची तडफड झाली . हात पाय झाडले . शेवटी तडफड बंद झाली . त्यांची जीवनयात्रा संपली .
दुसऱ्या दिवशी पोलिसांना मृतदेह सापडला . त्यांनी मृतदेह ताब्यात घेतला . प्राथमिक चौकशीनंतर आत्महत्येचा निर्वाळा दिला . केस बंद . देशात अगोदरच गोंधळ माजलेला होता . लोक वैतागले होते . बातम्यांसाठी आपसूकच मसाला मिळाला . मुळातच तो सामान्य नव्हता , प्रसिद्ध होता . सर्वच माध्यमांनी त्याच्या प्रकरणात रस घेतला . दिवसभर त्याच्याच बातम्या दिसू लागल्या . त्यातच कुणीतरी त्याच्या मैत्रिणीची मुलाखत घेतली . तिने सहजच बोलत-बोलत स्वतःला दोष दिला . माध्यमांना तेवढेच हवं होतं . त्यांनी तिचं तेच वाक्य उचलून धरलं . त्याच्यावर चर्चा , वादविवाद आणि विश्लेषण द्यायला सुरुवात केली .
बंद झालेली केस पुन्हा उघडली . त्या मैत्रिणीची चौकशी पोलिसांनी सुरू केली . त्यांना काही सापडलं नाही . मात्र माध्यमांनी तिला आरोपीवरून गुन्हेगार जाहीर केलं होतं . फक्त शिक्षा ठोठावनं बाकी राहिलं होतं .
" प्रेयसीने केला प्रियकरावरचा खून
" काळ्या जादूला बळी पडला प्रियकर
" अच्छा सिला दिया तूने प्यार का
" प्यार तूने क्या किया
असे सगळे मथळे चालवुन झाले . नंतर माध्यमांनी त्यांचे स्वतःचे संशोधक संघ बनवले आणि त्यांना खुनाचा तपास करायला सांगितला . त्यांच्या संशोधक संघानी कुठून तरी कसे तरी पुरावे गोळा केले आणि खून कसा केला असावा हे सांगायला सुरुवात केली . प्रत्येक वाहिनीवर प्रत्येक संशोधक संघाची वेगळी थेरी होती . कुणी म्हणायचं असा खुन केला , कुणी म्हणायचं तसा खून केला आणि कुणी म्हणायचं वेगळ्याच पद्धतीने केला .
मात्र तिने खून केलाच नव्हता . ती निर्दोष होती . ती मागचे काही महिने त्याच्या संपर्कातही नव्हती . फोनवरून हिचा संपर्क नव्हता . मात्र तिला आता विचित्र स्वप्ने पडू लागली होती . तो खोलीत शांत बसला होता . ती ही तिथे होती . तिच्या हातात ते दावे होते . तिने फास बनवला . त्याच्या गळ्यात अडकवला . हाताने तो जोरात आवळला . त्याने हात-पाय झाडले , पण ती फास आवळतच राहिली . शेवटी त्याची तडफड बंद झाली . नंतर तिने त्याला पंख्यावर लटकवाले .
मागचे काही दिवस तिला असे स्वप्न पडत होते . एक दिवशी ती स्वप्नातुन दचकून जागी झाली . समोर टीव्ही चालू होता . ती घाबरली टीव्ही वरती बातमी चालू होती .
" फॉरेन्सिक रिपोर्ट मध्ये सापडले प्रेयसीच्या बोटाचे ठसे . पोलीस अटक करायला निघाले ...
" आता कुठे मिळाला न्याय , अब जा कर हुआ इन्साफ..
" आमच्या वाहिनीच्या साततच्या दबावामुळे पोलिसांनी केली कामगिरी...
बाहेर सायरनचा आवाज आला . टीव्हीवर तिचं घर दिसत होतं . दार उघडलं पोलिसात आले , कॅमेरे आले . तिला अटक झाली .
कथा काल्पनिक आहे
