सिनेमा रिव्यू- Kuttrame Thandanai -एक संथ सस्पेन्स तामिळ सिनेमा. (प्रतिसादात स्पाॅयलर अॅलर्ट)

माणसाचं आयुष्य हे नेहमीच ज्याच्या त्याच्या कर्माने घडतं असतं. कळत नकळत आपण जे कर्म करतो त्यांची फळे आपल्याला कुठे ना कुठे नक्कीच कधी स्पष्ट रूपात तर कधी अप्रत्यक्षरित्या आपल्याला भोगावी लागतात. ह्याच संकल्पनेवर आधारित ह्या सिनेमाचं शिर्षक निवडलं असावं असं माझं स्पष्ट मत आहे.

Kuttrame Thandanai चा अर्थ इंग्रजीत सांगायचा झाल्यास "Crime itslef is a punsihment" असा होतो. एव्हाना अर्थाने तुम्हाला कळलं असेलचं की, हा सिनेमा Crime based सिनेमा आहे ते. पण hold on हा सिनेमाची कथा थोडी वेगळी आहे आणि म्हणूनच हा सिनेमा प्रेक्षकांच्या मनात सहज घर करून जातो.

सिनेमा सुरू होतो आणि तिसर्या सिनमध्येच हा सिनेमा थोडा वेगळा आहे हे कळतं. कथेचा नायक रवीचंद्रनला ऊर्फ रवीला
टनल विझनचा प्रोब्लेम आहे. ह्या प्रोब्लेममुळे नायकाला फक्त समोरचं गोलाकार दिसतं आजूबाजूला फक्त अंधार. कळायला सोपं जावं म्हणून चित्रपटातलाच एक फोटो देत आहे -

अशा या नायकाला बघून आपल्याला त्याच्याबद्दल नकळतपणे सहानुभती वाटते. चेकअप करायला जातो तेव्हा त्याला नव्यानेच कळतं की, त्याचा प्रोब्लेम खुप मोठा आहे आणि वेळीच आय ट्रान्सप्लांट नाही केले तर हळूहळू त्याची संपूर्ण दृष्टीही जाऊ शकते. लहानपणापासून त्याला हा प्रोब्लेम आहे पण त्याची अशी भाबडी समजूत असते सगळ्यांना इतकंच दिसत असावं. रवी हा एका एजन्सीमध्ये क्रेडीट कार्ड पेयमेंट कलेक्शनच काम करत असतो. त्याच्या आयुष्यात इन मिन तीन चार माणसं आहेत. एक म्हणजे त्याचा बाॅस, दुसरी त्याच्यावर अव्यक्त प्रेम करणारी कलिग अनु, त्याचा वयस्कर मित्र नासर आणि चौथी व्यक्ती म्हणजे त्याच्या घरासमोर राहणारी मुलगी श्वेता.

अशाच एका रात्री श्वेताच्या घराचं दार तो ठोठवतो. दार एक मध्यमवयीन माणूस उघडतो आणि कथा एका नव्या वळणावर येते. श्वेताचा खून झालेला असतो आणि दार उघडलेला माणूस श्वेताचा बाॅस विजयप्रकाश असतो. तिचा बाॅस येण्याआधीच तिचा खून झालेला असतो पण रवीने पोलीसांसमोर आपली साक्ष देऊ नये म्हणून तिचा बाॅस रवीला काही पैसे ऑफर करायची तयारी दर्शवतो आणि रवीलाही ट्रिटमेंटसाठी 320000 हवे असतात म्हणून रवी त्याच्याकडून तितकेच पैसे घेतो. जमा केलेले पैसे घेऊन जेव्हा रवी हाॅस्पिटलात जातो तेव्हा त्याला कळतं की, ह्याउपर अजून आयसीयू चार्जेस, डाॅक्टर फी ह्यांचे वेगळे पैसे भरावे लागतील. तेव्हा रवी पुन्हा विजयप्रकाशला संपर्क करण्याचा प्रयत्न करतो. मधल्या काळात पोलीस रवीच्या घरी चौकशीसाठी येतात आणि रवी साक्ष द्यायला तयार होतो. जेव्हा तो साक्ष द्यायला पोलिस स्टेशनला जातो तिथे आधीच एका आरोपीची पोलीस चौकशी करत असतात. आरोपी हा श्वेताचा बाॅयफ्रेड अरूण असतो. अरूणला काही लोकांनी श्वेताचा खून होण्याच्याआधी तिच्या घरातून रागाने येताना पाहीलेलं असतं आणि म्हणूनच पोलीस त्याची चौकशी करत असतात. जेव्हा तिथला पोलिस हाच का तो मुलगा? असं विचारतो तेव्हा रवी हाच तो म्हणून निघून येतो. जेव्हा अरूणच्या वकीलाला रवीविषयी कळतं तेव्हा ते त्याला साक्ष फिरवण्यासाठी पाच लाखाची ऑफर करतात आणि अरूणदेखिल ह्याला तयार होतो..

ह्या सगळया गुंत्यात खरा कुणी कोण? रवीच्या डोळयांचं ऑपरेशन होऊन तो ठीक होतो का? अनुचं प्रेम रवीला कळत का? बाॅस नेमका श्वेताच्या घरी कशासाठी आलेला असतो?
रवि नेमक्या कुणाच्या बाजूने साक्ष देतो? ह्या सगळया प्रश्नांच्या उत्तरांसाठी सिनेमा पाहायलाच हवा.

ह्या सिनेमाची सगळ्यात जमेची बाजू म्हणजे ह्या सिनेमाची सिंपलीसिटी, नैसर्गिकपणे केललं डायरेक्शन आणि कलाकारांचा उत्तम अभिनय. बर्याचशा सिनला डायरेक्टरने कुठलही बॅकग्राऊंड म्युझिक दिलं नाहीये. आजुबाजूचा गोंगाट, ट्रॅफिकचा आवाज, रवी जिथे राहतो तिथल्या रहिवाशांचं पाठीमागे होणारं बोलणं ह्यामूळे संपूर्ण सिनेमा हा खुपच रिअलास्टीक वाटतो. अभिनयाच्या बाबतीत म्हणायचं झालं तर "रवी" साकारलेल्या विधार्तने भूमिकेला पुरेपुर न्याय दिला आहे. त्याचा अभिनय हा अभिनय वाटतचं नाही इतकं त्याने समरसून काम केलं आहे. ऐश्वर्या राजेश (श्वेता) हिच्या वाटेला फारसे सीन नाहीत पण तिनेही ठीकठाक काम केलं आहे. पुजा देवरियाने अनुची भूमिका उत्तम साकारली आहे. स्पेशली तिच्या चेहर्यातला गावरान गोडवा आणि तिचा साधेपणा कायम लक्षात राहतो. नासर ह्या चित्रपटात का आहे हा प्रश्न खुप वेळा पडतो पण नासर आणि रवीच्या संभाषणातूनच रवीच्या मूळ कॅरेक्टरला एक्सप्रेस होण्याचा वाव आहे असं नंतर लक्षात आल्याशिवाय राहत नाही. चित्रपटाच लेखन आणि डायरेक्शन आणि छायाकंन ह्या तीनही बाजू मनिकंदनने सांभाळल्या आहेत आणि म्हणूनच हा सिनेमा चांगला जमलाय असं म्हणायला हरकत नाही कारण लेखक आपल्या कल्पनेतली कथा परद्यावर इतर डायरेक्टरपेक्षा जास्त प्रभावी मांडू शकतो असं माझं तरी मत आहे. कथेला कुठल्याच गाण्याची गरज नाही हे ओळखून केवळ लांबी वाढवण्यासाठी गाण्याचा वापर केला नाहीये हे आवडलं. (तसंही मूळ तामिळ गाणी हिंदित डब केल्यानंतर ऐकण्याजोगी नसतातच.) यु ट्यूबवर हा सिनेमा मोफत पाहता येईल त्यासाठी खाली लिंकसुद्धा देतोय नक्की पाहा.

https://www.youtube.com/watch?v=dpHaJKput7c

पात्रे :

रविचंद्रन (रवी) - विधार्त
श्वेता - ऐश्वर्या राजेश
अनु - पुजा देवरिया
रेहमान - विजयप्रकाश
नासर - नासर (पात्राच्या नावाचा उल्लेख कुठेच येत नाही म्हणून नासर)
शिरीष अरविंद- अरूण.

का पाहावा :

संथ आणि साध्या पद्धतीने साकारलेल्या एक वेगळ्या सस्पेन्स थ्रिलरचा अनुभव घेण्यासाठी.

IMDb Rating : 7.8/10

मानांकन : ****1/2